Президент Администрациясида янги тайинловлар: Акрамжон Фозилов бошқа лавозимга ўтди, Азиза Қурбонова унинг ўрнини эгаллади
Ўзбекистон Президенти Администрациясида навбатдаги кадрлар ўзгариши амалга оширилди. Акрамжон Фозилов Президент маслаҳатчисининг биринчи ўринбосари этиб тайинланди. Унинг аввалги лавозимини эса Азиза Қурбонова эгаллади.
Президент Администрацияси раҳбарининг тегишли фармойишига мувофиқ, Акрамжон Фозилов Президентнинг вакиллик органлари, нодавлат нотижорат ташкилотлари ва ёшлар масалалари бўйича маслаҳатчисининг биринчи ўринбосари лавозимига тайинланди.
Шу муносабат билан у Президент Администрацияси Коммуникациялар департаменти бошлиғининг биринчи ўринбосари лавозимидан озод этилди.
Акрамжон Фозилов бунга қадар Миллий масс-медиани қўллаб-қувватлаш ва ривожлантириш жамоат фонди васийлик кенгашига раҳбарлик қилган. 2026 йил февраль ойида эса Президент Администрацияси Коммуникациялар департаменти бошлиғининг биринчи ўринбосари этиб тайинланган эди.
Таниқли журналист Азиза Абдусабитовна Қурбонова Президент Администрацияси Коммуникациялар департаменти бошлиғининг биринчи ўринбосари лавозимига тайинланди. У ушбу лавозимда Акрамжон Фозиловнинг ўрнини эгаллади.
Telegram |Instagram | You Tube | Facebook | X
Хушнуд Худойбердиев Президент Администрациясида юқори лавозимга тайинланди
Таниқли ҳуқуқшунос ва блогер Хушнуд Худойбердиев Президент Администрацияси Коммуникациялар департаменти бошлиғи ўринбосари лавозимига тайинланди. У бунга қадар Ўзбекистон Миллий ахборот агентлиги (ЎзА) бош директорининг биринчи ўринбосари сифатида фаолият юритиб келаётган эди.
Тайинлов Президент Администрацияси раҳбарининг тегишли фармойиши билан амалга оширилди.
Хушнуд Худойбердиев 1989 йилда Қашқадарё вилоятининг Чироқчи туманида туғилган. 2010 йилда Тошкент давлат юридик институтини, 2012 йилда эса ушбу олийгоҳ магистратурасини тамомлаган.
Меҳнат фаолияти давомида Тошкент давлат юридик институтида ўқитувчи, Ўзбекистон касаба уюшмалари федерацияси тизимида ҳуқуқшунос, Бош прокуратурада бўлим прокурори лавозимларида ишлаган.
Шунингдек, Миллий масс-медиани қўллаб-қувватлаш ва ривожлантириш жамоат фонди директори бўлган.
2020 йил июль ойида ЎзА бош директори ўринбосари этиб тайинланган, кейинчалик агентлик бош директорининг биринчи ўринбосари лавозимида фаолият юритган.
Telegram |Instagram | You Tube | Facebook | X
🔴Тошкент марказидаги ноёб маданий мерос объекти махфий қарор билан кимга бепул берилмоқда?
✔️Музей ходимлари кўзда ёш билан миллатнинг ноёб маданий мероси асраб қолинмаётганини айтмоқда
🎥 Батафсил видеода
Иккинчи жаҳон урушидан, 1966 йил зилзиласидан омон қолган Тошкентдаги Навоий музейи Янги Ўзбекистон даврига келиб тугатиладими?
Музей ходимларининг айтишича, 847 та нодир қўлёзма аллақачон бошқа муассасага олиб ўтилган. Ислом цивилизация марказига кўчирилган қўлёзмалар билан ишлашга ходимлар киритилмаяпти. Энг ачинарлиси, бинодаги ноёб деворий суратларни кўчиришнинг деярли имкони йўқ. Юқорига йўлланган мурожаатлар жавобсиз қолмоқда.
Музей биноси нима учун Ёшлар театрига берилмоқда? Нега кўчириш ҳақидаги қарор жамоатчиликка очиқланмади? Маданий мероснинг кейинги тақдирига ким жавоб беради? Очиқ қолган саволларга масъуллардан жавоб кутиб қоламиз.
Telegram |Instagram | You Tube | Facebook | X
edited
🔴Hilton ортидаги миллионлар: Ортиқхўжаев бизнесининг АҚШда ошкор бўлган молиявий алоқалари
✔️Ортиқхўжавев АҚШ бозорига кириши ортидан 100 миллион долларлик кафолатлари очиқланди
✔️Ортиқхўжаевнинг бизнеси АҚШ фонд бозорига чиққан биринчи ўзбек компанияси бўлди
Тошкентнинг собиқ ҳокими, тадбиркор Жаҳонгир Ортиқхўжаевга тегишли йирик бизнес гуруҳи АҚШ қимматли қоғозлар бозорига чиқди. Энди унинг меҳмонхона ва туризм соҳасидаги бизнеси акциялари Америка бозорида савдо қилиниши мумкин. Бу эса компанияга хорижий сармоядорлардан маблағ жалб қилиш имконини беради.
Гап Тошкентдаги Hilton, Бухородаги Wyndham меҳмонхонаси ва CAEx кўргазмалар марказини бошқарувчи Tourism and Entertainment Group (TEG) ҳақида кетмоқда.
Компания бу воқеани Ўзбекистон бизнеси учун катта ютуқ сифатида тақдим этмоқда. Бироқ АҚШда акциялари савдо қилинадиган компаниялар ўз молиявий фаолияти, қарзлари ва мулкдорлари ҳақида батафсил маълумотларни ошкор қилиши керак.
Айнан шу ҳужжатларда Ортиқхўжаев бизнесининг жамоатчиликка унчалик маълум бўлмаган молиявий муносабатлари ҳам очиқланди. Жумладан, компания ўз таркибига кирмайдиган, аммо ўша мулкдор назоратидаги бошқа корхонанинг 100 миллион долларлик кредитига кафил бўлган. Шунингдек, ҳисоботларда мулкдорга йўналтирилган 17,5 миллион доллардан ортиқ маблағ ва ўзаро боғлиқ компаниялар ўртасидаги қарийб 36 миллион долларлик операциялар кўрсатилган.
Хўш, Ортиқхўжаев бизнесининг Америка бозорига чиқиши ортида қандай молиявий муносабатлар бор? Компания кимнинг қарзи учун жавобгарликни зиммасига олган ва миллионлаб долларлар қандай тақсимланган?
Батафсил
Telegram |Instagram | You Tube | Facebook | X
🔴Мирзиёев Осиёдаги можаролар, сунъий интеллект ва иқлим хавфсизлиги бўйича янги ташаббусларни илгари сурди
Президент Шавкат Мирзиёев 15 октябрь куни Бокуда бўлиб ўтган Осиёда ҳамкорлик ва ишонч чоралари бўйича кенгашнинг еттинчи саммитида нутқ сўзлаб, минтақавий хавфсизлик, сунъий интеллект ва иқлим ўзгаришига доир қатор таклифларни билдирди.
Давлат раҳбари матбуот хизматининг ёзишича, дунёда геосиёсий зиддиятлар кучайиб, қуролли можаролар нафақат улар юз бераётган ҳудудларга, балки бутун минтақа хавфсизлиги ва жаҳон иқтисодиётига таъсир кўрсатаётгани таъкидланган.
Мирзиёев Яқин Шарқдаги вазият ва Ғазодаги гуманитар инқироздан хавотир билдирди. Унинг таъкидлашича, барча низолар халқаро ҳуқуқ асосида, фақат сиёсий-дипломатик воситалар орқали ҳал этилиши керак.
Осиёда ўзаро ишончни мустаҳкамлаш учун махсус концепция ишлаб чиқишни таклиф қилинди. У транспорт, энергетика, савдо ва рақамли алоқалар бўйича қўшма лойиҳаларни қамраб олиши керак.
Саммитда Ўзбекистон қуйидаги янги ташаббусларни илгари сурди:
▪️ Сунъий интеллект хавфсизлиги — технологиялардан масъулият билан фойдаланиш бўйича Осиё ташаббусини ишлаб чиқиш ва экспертлар майдонини ташкил этиш.
▪️ Иқлим хавфсизлиги — сув тежовчи технологиялар, яшил энергетика ва экологик мониторинг бўйича ҳамкорликни кучайтириш.
▪️ Инсон ҳуқуқлари ва таълим — 2027 йилда Ўзбекистонда Инсон салоҳиятини ривожлантириш форумини ўтказиш. Унда ёшлар, хотин-қизлар, сифатли таълим ва рақамли даврда инсон ҳуқуқларини ҳимоя қилиш масалалари муҳокама этилади.
▪️ Минтақавий ҳамкорлик — Кенгашнинг келгуси икки йилга мўлжалланган Ҳаракатлар дастурини ишлаб чиқиш.
Мирзиёев 2027 йилда Ўзбекистон Қўшилмаслик ҳаракатининг 20-саммитига мезбонлик қилишини ҳам эслатди. Мамлакат 2030 йилгача ушбу ташкилотга раислик қилади.
Президент Осиё давлатлари раҳбарларини Тошкентда ўтадиган саммитга таклиф қилди.
Шунингдек, Ўзбекистон Озарбайжоннинг Кенгашга раислигини 2028 йилгача давом эттиришини ҳамда ташкилот Бош котиблигига Озарбайжон вакили номзодини қўллаб-қувватлашини билдирди.
Telegram |Instagram | You Tube | Facebook | X
Тошкентнинг ягона аёл ҳокими яна прокуратура тизимига қайтди
Яккасарой тумани ҳокими Нилуфар Аллабергенова Тошкент шаҳар прокурори ўринбосари лавозимига тайинланди. У пойтахт туманларига раҳбарлик қилаётган ягона аёл ҳоким эди.
Нилуфар Аллабергенова 1971 йилда Тошкент шаҳрида туғилган. 1995 йилда Тошкент давлат юридик институтини тамомлаган.
У прокуратура тизимида катта тажрибага эга. Турли йилларда Яшнобод, Чилонзор ва Мирзо Улуғбек туманлари прокурорлари ўринбосари лавозимларида ишлаган.
2019–2023 йилларда Яккасарой тумани прокурори бўлган. 2023 йил 9 октябрда эса шу туман ҳокими этиб тайинланган. Ўшанда у Тошкент туманларига раҳбарлик қилган биринчи аёл сифатида эътибор қозонган эди.
Telegram |Instagram | You Tube | Facebook | X
🔴Тошкентнинг учта туманига янги ҳоким тайинланди
✔️Бири бошқа туманга ўтди, иккиси лавозимда кўтарилди
Тошкент шаҳрининг Чилонзор, Янгиҳаёт ва Яшнобод туманларига янги ҳокимлар тайинланди. Бу ҳақда пойтахт ҳокимлиги матбуот хизмати хабар берди.
Чилонзор туманига Ҳаёт Иногамов ҳоким этиб тайинланди. У 1986 йилда Тошкентда туғилган. Тошкент автомобиль йўллари институтини тамомлаган. 2020 йилдан буён Янгиҳаёт тумани ҳокими лавозимида ишлаб келаётган эди. Шу тариқа, у олти йил раҳбарлик қилган туманидан Чилонзорга ўтказилди.
Янгиҳаёт туманига Лазизбек Темиров ҳоким бўлди. У 1989 йилда Фарғона вилоятида туғилган. Тошкент давлат иқтисодиёт университетини тамомлаган. 2024 йилдан Яшнобод тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари бўлиб ишлаган.
Яшнобод туманига Абдулазиз Абдулхаков ҳоким этиб тайинланди. У 1980 йилда Тошкентда туғилган. Тошкент давлат техника университетини тамомлаган. 2018–2025 йилларда Мирзо Улуғбек тумани ҳокимининг қурилиш ва инфратузилма масалалари бўйича ўринбосари бўлган. Сўнгги пайтларда «UET Construction» МЧЖда департамент директори лавозимида ишлаган.
Эътиборлиси, уч ҳокимнинг барчаси маҳаллий давлат бошқаруви тизимида тажриба орттирган. Улардан бири бошқа туманга ўтказилган бўлса, қолган икки нафари илгари ҳоким ўринбосари бўлиб ишлаган мутахассислардир.
Аввал Чилонзор туманига Саидқаҳҳор Холхўжаев, Яшнободга Бахтиёр Раҳмонқулов, Янгиҳаётга эса Ҳаёт Иногамов раҳбарлик қилган. Иногамов Чилонзорга ўтказилди, қолган икки собиқ ҳокимнинг кейинги лавозими ҳозирча маълум эмас.
Telegram |Instagram | You Tube | Facebook | X
🔴Қозоғистон билан боғлиқ хакерлар Россия ва Марказий Осиё давлат идораларига киберҳужум уюштирган бўлиши мумкин
Қозоғистон билан алоқадор бўлиши мумкин бўлган Silent Lynx хакерлар гуруҳи Россиядаги нефтьни қайта ишлаш заводи, Нижний Новгород шаҳар маъмурияти ва Марказий Осиё давлат идораларини нишонга олган.
Reuters агентлигининг 14 октябрдаги хабарига кўра, Cisco ва Recorded Future мутахассислари хакерлар фаолиятини ўрганиб, уларнинг Қозоғистон билан эҳтимолий алоқасини аниқлаган.
Жумладан, Қозоғистон ва Тожикистон ўртасидаги шартнома ратификация қилинаётган пайтда Тожикистон давлат идораларидан бирининг компьютер тизимига кирилган.
Тадқиқотчилар киберҳужумларда разведка маълумотларини тўплаш мақсади бўлганини тахмин қилмоқда.
Бироқ хакерларнинг Қозоғистон ҳукумати билан боғлиқлиги исботланмаган.
Telegram |Instagram | You Tube | Facebook | X
🔴Ўзбекистонлик шифокор самолётда оғир аҳволга тушиб қолган кореялик аёлнинг ҳаётини сақлаб қолди
Самарқандлик шифокор Ҳасан Комилов Жанубий Кореяга учаётган самолётда қон босими кескин тушиб кетган аёлга шошилинч тиббий ёрдам кўрсатди. Бу ҳақда Жанубий Кореянинг The Korea Herald нашри хабар берди.
Ҳодиса 11 октябрь куни Ўзбекистондан Жанубий Кореяга йўл олган самолётда содир бўлган. Парвоз давомида йўловчи аёллардан бирининг аҳволи оғирлашиб, қон босими кескин пасайган. Унинг пастки қон босими 20 гача тушиб кетган. Бу ҳаёт учун хавфли ҳолат ҳисобланади.
Самолёт экипажи йўловчилар орасида шифокор бор-йўқлигини сўраган. Шу рейсда кетаётган 43 ёшли самарқандлик шифокор Ҳасан Комилов дарҳол ёрдамга ошиққан.
У ўзи билан олиб кетаётган дори воситалари ва тиббий ускуналардан фойдаланиб, аёлга тахминан 15 дақиқа давомида шошилинч ёрдам кўрсатган.
Вазият шу қадар жиддий бўлганки, учувчилар самолётни фавқулодда қўндиришга тайёргарлик кўришган. Бироқ шифокорнинг аралашувидан кейин аёлнинг аҳволи барқарорлашган ва самолёт Сеулга парвозини давом эттирган.
Ҳасан Комилов 16 йиллик тажрибага эга қулоқ, бурун ва томоқ касалликлари шифокори. У Жанубий Кореяга Чунгбук миллий университети шифохонасида малака ошириш учун кетаётган бўлган.
«Мен хавфни тушунардим. Аммо унга ёрдам беришни хоҳладим. Ўз касбини чиндан севадиган ҳар қандай шифокор шундай қилган бўларди», — деган Комилов.
Telegram |Instagram | You Tube | Facebook | X
🔴Иш излаб бориб, фронтга тушиш хавфи: Россияда мигрантларга босим кучаймоқда
Россияда бир томондан ишчи кучи танқислиги сақланяпти, иккинчи томондан эса мигрантлар учун чекловлар кўпаймоқда. 2026 йилнинг биринчи ярмида Ўзбекистон, Тожикистон ва Қирғизистон фуқароларининг Россияга ишлаш учун кириши қарийб 15 фоизга камайган.
Шу билан бирга, халқаро ташкилотлар ва ОАВ Россияга иш излаб борган айрим мигрантларни Украинадаги урушга жалб қилиш, уларга ҳарбий шартнома имзолатиш учун алдаш ёки босим ўтказиш ҳолатлари ҳақида хабар бермоқда.
Украина томонига қарашли «Хочу жить» лойиҳаси май ойигача Россия Мудофаа вазирлиги билан шартнома имзолаган 12,9 мингдан ортиқ Марказий Осиё фуқаросини, жумладан 4 955 нафар ўзбекистонликни аниқлаганини билдирган. Бу рақамлар мустақил тасдиқланмаган.
Ўзбекистон Миграция агентлиги ҳам фуқароларни «иш» ёки «юридик ёрдам» ваъдаси билан ҳарбий ҳаракатларга жалб қилиш ҳолатларидан огоҳлантирган.
Айни пайтда Россияда ишсизлик атиги 2,2 фоиз, 2030 йилга бориб эса мамлакатда 2,6 миллионгача ишчи етишмаслиги мумкин.
Ғалати парадокс - Россияга ишчи керак, аммо анъанавий меҳнат мигрантлари учун ишлаш тобора қийинлашяпти.
🔗Батафсил сайтимизда ўқинг!
Telegram| Instagram | You Tube | Facebook | X
🔴Одамларнинг 8 миллион доллардан ортиқ банкдаги пулини ўмарган гуруҳ фош этилди
✔️Жиноятга банк ходими ҳам аралашган
«Фирибгарлар номингизга кредит олишга уриняпти», деб қўнғироқ қилган шахслар аслида фуқароларнинг шахсий маълумотларини қўлга киритиб, карталаридаги пулларни ечиб олган ва уларнинг номига онлайн кредитлар расмийлаштирган.
ДХХ хабарига кўра, гуруҳ аъзолари орасида банклардан бирининг бош офиси киберхавфсизлик бўлими ходими ҳам бўлган. Банк номи очиқланмаган.
ДХХ Сирдарё вилояти бошқармаси ва вилоят ИИБ ҳамкорлигида ўтказилган тадбирларда мазкур гуруҳ фаолиятига чек қўйилган.
Маълум қилинишича, Тошкент шаҳри ва вилоятида яшовчи беш киши Миробод туманидаги нотурар бинони ижарага олиб, сохта колл-марказ ташкил қилган. Унга алоқадор яна бир шахс ижарага олинган хонадонга қўнғироқлар учун ноқонуний GSM-шлюз қурилмасини ўрнатган.
Гуруҳга Тошкент вилоятида яшовчи, 1979 йилда туғилган, муқаддам судланган шахс раҳбарлик қилгани айтилмоқда. Улар турли банклар номидан қўнғироқ қилиб, фуқароларни алдаган.
Хабарга кўра, жиноий йўл билан топилган жами 8 миллион доллар криптовалюта кўринишида сохта МЧЖ орқали хорижга чиқарилиб, легаллаштирилган.
Ҳолат юзасидан жиноят иши қўзғатилган. Дастлабки тергов давомида ушбу фаолиятга алоқадор 10 нафар шахс аниқланган.
Муаммо кўламини ИИВнинг сўнгги маълумотлари ҳам кўрсатади. 2026 йилнинг тўққиз ойида 17 483 та кибержиноят фош этилган, жиноятларга алоқадор 43 мингдан ортиқ банк картаси блокланган. 19 мингдан зиёд фуқарога 209,9 миллиард сўмдан ортиқ маблағ қайтарилган.
Telegram| Instagram | You Tube | Facebook | X
🔴Мирзиёев ва Алиев Бокуда нима ҳақида гаплашди?
Президент Шавкат Мирзиёев 14 октябрь куни Бокуда Озарбайжон президенти Илҳом Алиев билан учрашди.
Музокараларда август ойида Тошкентда эришилган келишувлар ижроси ва қўшма лойиҳаларнинг бориши муҳокама қилинди.
Ўзбекистон президенти матбуот хизмати маълумотига кўра, йил бошидан буён икки мамлакат ўртасидаги товар айирбошлаш ҳажми 30 фоизга ошган. Геология, энергетика, қурилиш, транспорт, логистика, енгил саноат ва туризм соҳаларидаги ҳамкорлик лойиҳалари фаол босқичга ўтган.
Бокудаги учрашувда президентлар маданий-гуманитар алмашинувлар, халқаро ва минтақавий масалалар ҳамда навбатдаги тадбирлар режасини ҳам кўриб чиқди.
Мирзиёев Озарбайжонга Осиёда ҳамкорлик ва ишонч чоралари бўйича кенгашнинг еттинчи саммитида қатнашиш учун келган. Ҳайдар Алиев халқаро аэропортида уни бош вазир ўринбосари Шоҳин Мустафоев кутиб олган.
Саммит якунлари бўйича Боку декларацияси ва кенгаш фаолияти самарадорлигини оширишга қаратилган қарорлар қабул қилиниши режалаштирилган.
Telegram| Instagram | You Tube | Facebook | X
🔴Ўзбекистонда болаларга нисбатан жинсий зўравонлик учун умрбод қамоқ жазоси жорий этилди
Энди 14 ёшга тўлмаган болаларга нисбатан айрим оғир жинсий жиноятларни содир этган шахслар 25 йилгача ёки умрбод озодликдан маҳрум қилиниши мумкин. Бундай жиноятлар учун жавобгарликка тортиш муддатига чеклов қўйилмайди.
Президент администрацияси раҳбари Саида Мирзиёева болаларни зўравонликдан ҳимоя қилишга қаратилган янги қонун имзолангани ҳақида ёзди.
Унинг таъкидлашича, Президент Шавкат Мирзиёев имзолаган қонун билан бир вақтнинг ўзида 5 та кодекс ва 6 та қонунга ўзгартириш киритилмоқда.
«Ёш болага нисбатан зўравонликка асло тоқат қилиб бўлмайди, жазо эса муқаррар ва муросасиз бўлиши шарт», — деб ёзди Саида Мирзиёева.
✔️Янги қонун нималарни ўзгартиради?
Қонунга мувофиқ, 14 ёшга тўлмаган болаларнинг номусига тегиш ва уларга нисбатан жинсий эҳтиёжни зўрлик ишлатиб ғайритабиий усулда қондириш каби жиноятлар учун 25 йилгача ёки умрбод озодликдан маҳрум қилиш жазоси белгиланмоқда.
Шунингдек, болаларнинг ўлимига сабаб бўлган жиноятлар учун жазони енгиллаштиришга йўл қўйилмаслиги назарда тутилган.
Болага жисмоний ёки руҳий азоб етказган шахс, у таълим муассасаси ходими ёки боланинг яқин қариндоши бўлишидан қатъи назар, қонун олдида жавоб беради.
Янги қонун фақат жазони кучайтириш билан чекланмайди. Унда зўравонликдан жабрланган болаларнинг ҳуқуқларини тергов ва суд жараёнларида ҳимоя қилишга қаратилган қўшимча кафолатлар ҳам белгиланган. Жумладан, жабрланувчи болаларни сўроқ қилиш жараёнини видеога қайд этиш, давлат ҳисобидан адвокат ажратиш ҳамда гумонланувчи билан юзлаштиришни махсус тартибда ўтказиш назарда тутилган.
❗️Тўрт йилда 445 та жиноят иши
Олий Мажлисда келтирилган маълумотларга кўра, 2022–2025 йилларда Ўзбекистонда 14 ёшга тўлмаган болаларнинг номусига тегиш ҳолатлари юзасидан 445 та жиноят иши қўзғатилган.
Қонуннинг қабул қилиниши Наманган вилояти Учқўрғон туманидаги давлат боғчасида беш ёшли қизга нисбатан жинсий зўравонлик содир этилгани ҳақидаги хабарлар жамоатчиликда кескин муҳокамаларга сабаб бўлган даврга тўғри келди.
Саида Мирзиёева мазкур воқеага аввал ҳам муносабат билдириб, болани ҳимоя қила олмаган, ўз бепарволиги билан жиноят содир этилишига шароит яратган масъулларнинг ҳаракатларига ҳам ҳуқуқий баҳо берилиши кераклигини таъкидлаган эди.
Эслатиб ўтамиз, болаларни зўравонликдан ҳимоя қилишга қаратилган қонун 29–30 сентябрь кунлари Қонунчилик палатасида кўриб чиқилган, 2 октябрда эса Сенат томонидан маъқулланган эди.
Telegram| Instagram | You Tube | Facebook | X
edited
🔴 “Ўзбекистонда 100 мингга яқин аёлларга ҳимоя ордери берилган”
ИИВ
Ўзбекистонда оилавий низолар, рашк ва турмушдаги келишмовчиликлар оқибатида содир этилаётган қотилликлар кўпаймоқда. Ички ишлар вазирлиги маълумотига кўра, аёлларни зўравонликдан ҳимоя қилиш мақсадида 100 мингга яқин ҳимоя ордери берилган.
Бу ҳақда ИИВ Жамоат хавфсизлиги департаменти Ҳуқуқбузарликлар профилактикаси хизмати бошлиғининг ўринбосари, полковник Раҳимжон Наимов матбуот анжуманида маълум қилди.
Унинг таъкидлашича, айрим қотилликларга рашк, эр-хотин, қайнона-келин ва яқин қариндошлар ўртасидаги низолар сабаб бўлмоқда.
«Оила-турмуш доирасидаги қотилликлар кўпайяпти. Шунинг учун биз бугунги кунда аёлларимизга 100 мингга яқин ҳимоя ордерлари берганмиз», — деди Наимов.
ИИВ вакилининг айтишича, бундай жиноятларнинг олдини олиш учун профилактика инспекторлари оилалардаги вазиятни кузатиб, низоларнинг оғир жиноятга айланиб кетмаслиги бўйича иш олиб бормоқда.
Шунингдек, у жамоат жойларидаги майда безориликлар, ўзаро ҳақорат ва йўл бериш билан боғлиқ тортишувлар ҳам баъзан оғир жиноятларга сабаб бўлаётганини билдирди.
Наимовнинг сўзларига кўра, бунинг олдини олиш мақсадида бозорлар, истироҳат боғлари ва аҳоли гавжум жойларда патруль хизмати кучайтирилган.
Telegram |Instagram | You Tube | Facebook | X
edited
🔴Қибрай туманида “Сув етказиб бериш хизмати” давлат муассасаси раҳбари ушланди
✔️У 16 минг доллар эвазига фуқаронинг уйи қурилишидаги камчиликларга «кўз юмиш»ни режалаштирган эди
Қибрай туманида «Сув етказиб бериш хизмати» давлат муассасаси раҳбари 5 минг АҚШ долларини олаётган вақтда ушланди. Бу ҳақда Бош прокуратура ҳузуридаги Департамент хабар берди.
Маълум қилинишича, муассаса раҳбари У.Ю. «Ғолиблар» маҳалласидаги фуқаронинг хонадони тегишли рухсатномалар асосида қурилган бўлса-да, унинг каналга яқинлигини важ қилиб, суд орқали чора кўрилишини айтган.
У фуқародан 16 минг доллар эвазига судда барча камчиликлар бартараф этилгани ҳақида кўрсатма бериш ва даъводан воз кечишни ваъда қилгани билдирилмоқда.
Тезкор тадбирда У.Ю. сўралган пулнинг 5 минг долларини хизмат хонасида олаётганида ашёвий далиллар билан ушланган.
Ҳолат юзасидан Жиноят кодексининг 210-моддаси — пора олиш билан жиноят иши қўзғатилган. Тергов ҳаракатлари олиб борилмоқда.
Telegram| Instagram | You Tube | Facebook | X
🔴Петербургдан қарийб 6,5 минг хорижлик чиқариб юборилди
✔️Улар орасида ўзбекистонликлар ҳам бор
2026 йил бошидан буён биргина Санкт-Петербургдан қарийб 6,5 минг хорижий фуқаро мажбуран чиқариб юборилган. Ўтган йилнинг шу даврида бу кўрсаткич 6 мингдан сал кўпроқ бўлган.
Бу ҳақда «Коммерсантъ» Россия Федерал суд ижрочилари хизматининг шаҳар бошқармасига таяниб хабар берди.
Идора маълумотига кўра, чиқариб юборилганлар орасида Ўзбекистон, Тожикистон ва Қирғизистон фуқаролари кўп учрайди.
Хорижликлар Россияга кириш ёки мамлакатда бўлиш қоидаларини бузгани учун суд томонидан маъмурий жавобгарликка тортилган. Суд ижрочилари уларни «Пулково» аэропортининг чегара пунктигача кузатиб борган. Идоранинг билдиришича, мамлакатдан чиқариб юборилганларга беш йил давомида Россияга қайта кириш тақиқланган.
Айни пайтда Петербург ва унинг атрофида миграция рейдлари ҳам ўтказилмоқда. «Вести — Санкт-Петербург» маълумотига кўра, 1–10 октябрь кунлари ўтказилган «Нелегал–2026» операцияси давомида транспорт полицияси мамлакатда бўлиш муддати тугаган хорижликларга нисбатан 25 та маъмурий баённома расмийлаштирган.
Ленинград вилоятининг Новоселье посёлкасидаги қурилиш майдонида 123 нафар хорижликнинг ҳужжатлари текширилгани айтилган. Полиция маълумотига кўра, уларнинг 47 нафари патент берилган ҳудуддан ташқарида, яна 10 нафари патентсиз ишлаган. Жами 57 киши ҳолатга аниқлик киритиш учун полиция бўлимларига олиб кетилган.
Текширув иш берувчини ҳам қамраб олган. Полиция хорижликларни ишга жалб қилишдаги эҳтимолий қоидабузарликларни ўрганмоқда. Мазкур рейдда аниқланган шахсларнинг фуқаролиги бўйича батафсил маълумот берилмаган.
Telegram| Instagram | You Tube | Facebook | X
📄uzdiplomat iqtibosi🖍
«Агар инсонда эркин гапириш ҳуқуқи бўлмаса, қолган ҳуқуқлар ҳам амалга ошмайди. Мамлакатда сўз эркинлигида ортга қайтилса, қолган ҳуқуқлар ҳақида ўйламаса ҳам бўлади».
Карим Баҳриев,
Журналист, таржимон, шоир, сиёсатчи
(1962-2026)
Telegram |Instagram | You Tube | Facebook | X
1 миллион сўмлик ёрдам кимларга берилиши мумкин?
Ноябрда берилиши таклиф этилаётган 1 миллион сўмлик бир марталик ёрдам фақат Ижтимоий реестрдаги оилалар билан чекланмайди. Президент фармони лойиҳасида реестрга кирмаган, аммо моддий кўмакка муҳтож оилаларни ҳам қамраб олиш назарда тутилган.
Лойиҳага кўра, ёрдам қуйидагиларга ажратилиши мумкин:
— Ижтимоий реестрга киритилган оилаларга.
— Реестрда бўлмаган эҳтиёжманд оилаларга. Бунда «маҳалла еттилиги» хулосаси ва давлат идораларининг ахборот тизимларидан олинган маълумотлар асосида оиланинг белгиланган мезонларга мослиги текширилади.
Жумладан, ҳар бир оила аъзосига тўғри келадиган ўртача ойлик даромад минимал истеъмол харажатларининг 2 бараваридан ошмаслиги кўзда тутилган.
— Марказлашган иситиш тизимига уланган кўп қаватли уйлардаги эҳтиёжманд оилаларга. Улар учун даромад чегараси Қорақалпоғистон ва вилоятларда ҳар бир оила аъзосига минимал истеъмол харажатларининг 2 баравари, Тошкент шаҳрида эса 3 бараваригача белгиланиши таклиф этилмоқда. Бундай уйда яшашнинг ўзи ёрдам олиш учун етарли эмас — оиланинг даромади ва ижтимоий ҳолати ҳам баҳоланади.
— Махсус реестрдаги, ўзгалар парваришига муҳтож ёлғиз яшовчи ҳамда ёлғиз кексалар ва ногиронлиги бўлган шахсларга. Шунингдек, етим ва ота-она қарамоғидан маҳрум болалар яшаётган оилаларга ҳам ёрдам бериш назарда тутилган.
Даромади белгиланган чегарадан ошса-чи?
Лойиҳада бундай айрим эҳтиёжманд оилаларни ҳам туман ёки шаҳардаги барқарор иш ўринларини яратиш ва аҳоли даромадларини ошириш бўйича штаб қарори билан рўйхатга киритиш имконияти кўзда тутилган.
Бундан ташқари, электр ва табиий газ учун компенсация олиш имкониятини кенгайтириш таклиф қилинмоқда. Оила аъзоси бошига даромад чегараси минимал истеъмол харажатларининг 1,5 бараваридан 2 бараварига оширилиши, компенсация тўлаш муддати эса 2028 йил 1 апрелгача узайтирилиши мумкин.
Кўмир хариди харажатининг бир қисмини қоплашда ҳам даромад мезони минимал истеъмол харажатларининг 1 бараваридан 2 бараварига оширилиши таклиф этилган.
Ушбу ёрдамни тўлаш муддатини 2029 йил 1 январгача узайтириш назарда тутилмоқда.
Ҳужжат ҳозирча лойиҳа босқичида. Ёрдам олувчилар тоифалари ва шартлари якуний ҳужжатда ўзгариши мумкин.
Telegram| Instagram | You Tube | Facebook | X
edited
🔴Қиш олдидан иссиқлик энергияси тарифлари ўзгариши мумкин
✔️ Эҳтиёжманд оилаларга эса 1 млн сўм ёрдам бериш таклиф этилмоқда
Ўзбекистонда 1 ноябрдан иситиш ва иссиқ сув тарифларини ўртача 30 фоизга, маиший баллонларда етказиладиган суюлтирилган газ нархини эса 2 мингдан 5 минг сўмга ошириш таклиф қилинмоқда.
Шу билан бирга, эҳтиёжманд оилаларга моддий ёрдам ва компенсация бериш назарда тутилган. Тегишли ҳужжат лойиҳалари жамоатчилик муҳокамасига қўйилган.
Лойиҳага кўра, Тошкентда иситиш ҳақи ҳар бир квадрат метр учун суткасига 241,44 сўмдан 314 сўмга, ҳисоблагичли хонадонларда иссиқ сувнинг бир куб метри эса 8 928,67 сўмдан 11 607 сўмга кўтарилиши мумкин.
Суюлтирилган газнинг бир килограммини 5 минг сўм қилиб белгилаш таклифи эса амалдаги 2 минг сўмлик нархдан 2,5 баравар юқори. Шу нархда 20 килограмм газ 100 минг сўмга тушади.
Эҳтиёжманд оилаларга 2030 йил 1 январгача ойига 20 килограммгача газнинг ҳар бир килограмми учун 3 минг сўмдан компенсация бериш таклиф қилинмоқда. Демак, 20 килограмм учун 60 минг сўм қайтарилса, оиланинг ўз ҳисобидан қиладиган харажати 40 минг сўм бўлади. Бу енгиллик белгиланган тоифадаги оилаларга, меъёр доирасида татбиқ этилиши кўзда тутилган.
Бундан ташқари, ноябрда эҳтиёжманд оилаларга 1 миллион сўмдан бир марталик ёрдам бериш режалаштирилмоқда.
Дастлабки ҳисоб-китобларга кўра, ёрдам 1 миллион 17 минг хонадонни қамраб олиши кутилмоқда.
Газлаштирилмаган ҳудудларда эса қиш мавсумида электр энергиясининг ойлик базавий меъёрини 200 дан 350 кВт·соатгача ошириш таклиф этилган. Бу шундай ҳудудлардаги хонадонларга кўпроқ электрни арзонроқ тарифда ишлатиш имконини беради.
Янги тарифлар ва ёрдам чоралари ҳозирча таклиф босқичида.
Telegram| Instagram | You Tube | Facebook | X
