Расея прапануе вывесці ядзерную зброю з Беларусі ў абмен на новы парадак бяспекі ў Еўропе Пра гэта піша Bild са спасылкай на звесткі пра неафіцыйныя перамовы аб спыненні расейска-ўкраінскай вайны. Масква таксама патрабуе прызнання акупацыі ўкраінскіх тэрыторый, нейтралітэту Украіны і адмовы ад яе ўступлення ў NATO. Сярод іншых умоваў — выхад Фінляндыі з NATO, абмежаванне прысутнасці альянсу ў краінах Балтыі і пераўтварэнне Малдовы ў федэратыўную рэспубліку. Узамен Крэмль нібыта гатовы вывесці ядзерную зброю з Беларусі, адмовіцца ад размяшчэння ракет сярэдняй далёкасці і вывесці войскі з Прыднястроўя. Bild падкрэслівае, што гэта толькі адзін з варыянтаў, якія абмяркоўваюцца ў неафіцыйных перамоўных колах, і невядома, ці падтрымлівае яго Пуцін.