У СМАРГОНІ З «НУЛЯВОГА КІЛАМЕТРА» ПРЫБІРАЮЦЬ СЦЯГІ СУСЕДНІХ КРАІНАЎ У Смаргоні камунальныя службы пачалі дэмантаж дэкаратыўнай кампазіцыі на кальцавой развязцы па вуліцы Савецкай. Сем гадоў таму яе ўсталявалі як сімвал міжнародных сувязяў і добрасуседства. Цяпер з канструкцыі зразаюць указальнікі з назвамі гарадоў і здымаюць абліцоўку ў колерах нацыянальных сцягоў. Пад дэмантаж трапілі Вільня, Варшава і Талін, а заадно і Масква — каб не пакідаць яе адну сярод беларускіх абласных цэнтраў. Арт-аб'ект з'явіўся ў 2019 годзе напярэдадні абласных «Дажынак». Тады яшчэ гаварылі пра шматвектарнасць, міжнароднае супрацоўніцтва і чакалі еўрапейскіх турыстаў. Указальнікі нагадвалі пра геаграфічную блізкасць Беларусі да суседзяў: да Вільні ад Смаргоні — усяго 77 км, да Мінска — 100 км, да Варшавы — 440 км, да Таліна — 554 км, да Масквы — 680 км. Сімвал добрасуседства, які прастаяў усяго сем гадоў, цяпер аказаўся непатрэбным.