У Польшчы выкрылі злачынную групоўку, якая нападала на грузавікі з кантрабанднымі цыгарэтамі. Сярод 13 абвінавачаных — пяцёра грамадзян Беларусі. Злачынцы пераапраналіся ў паліцэйскую форму, выкарыстоўвалі падробленыя нумары аўтамабіляў, збівалі кіроўцаў і захоплівалі фуры. Падчас аднаго з нападаў яны скралі грузавік з 21 мільёнам цыгарэт. Пры затрыманні паліцыя знайшла агнястрэльную зброю, больш за 1200 патронаў, гранаты і 2,4 кг выбухоўкі. Усяго групоўцы інкрымінуюць 22 злачынствы, учыненыя ў 2024–2025 гадах. Лідэра банды і яшчэ аднаго падазраванага затрымалі ў Іспаніі, пасля чаго экстрадавалі ў Польшчу.