Нямецкая брыгада ў Літве будзе сачыць за ваеннай актыўнасцю ў Беларусі і Калінінградскай вобласці Нямецкая 45-я танкавая брыгада «Літва», якую размяшчаюць на пастаяннай аснове ў Літве, будзе выкарыстоўваць сродкі радыёэлектроннай барацьбы для ранняга выяўлення ваенных пагроз з боку Беларусі і Калінінградскай вобласці РФ. Пра гэта 28 кастрычніка паведаміў Reuters віцэ-адмірал Томас Даум. Нямецкія вайскоўцы таксама будуць збіраць звесткі пра расійскія і беларускія радыёлакацыйныя сістэмы і крыніцы радыёсігналаў, каб абнаўляць базы даных радыёэлектроннай барацьбы Германіі і яе саюзнікаў. Зараз у Літве працягваецца місія Vigilant Owl («Пільная сава»), у межах якой каля 170 нямецкіх вайскоўцаў вядуць радыёэлектронную разведку. Цяперашні этап місіі разлічаны на перыяд з 23 кастрычніка да 7 снежня 2026 года. Поўнае разгортванне брыгады запланавана на 2027 год. Да канца года ў Літве павінны размясціць каля 4800 нямецкіх вайскоўцаў і 200 грамадзянскіх супрацоўнікаў. Разгортванне брыгады з'яўляецца часткай узмацнення ўсходняга флангу NATO пасля поўнамаштабнага ўварвання Расіі ва Украіну. Бундэсвер упершыню ў гісторыі размяшчае цэлую нямецкую брыгаду на пастаяннай аснове за мяжой.