У Астравецкім раёне мужчына страляў у міліцыянтаў — яго застрэлілі 65-гадовы жыхар вёскі Старая Рудня Астравецкага раёна адкрыў агонь па супрацоўніках міліцыі, пасля чаго тыя ўжылі зброю на паражэнне. Пра здарэнне паведаміў Telegram-канал МУС Беларусі. Паводле ведамства, міліцыю выклікалі мясцовыя жыхары, якія паведамілі, што мужчына мае незарэгістраваную паляўнічую стрэльбу і пагражае суседзям. На месца здарэння прыбылі супрацоўнікі міліцыі і байцы ўнутраных войскаў. У МУС сцвярджаюць, што мужчына аказаў узброенае супраціўленне і стрэліў у супрацоўнікаў. У адказ яны адкрылі агонь на паражэнне. Мужчына загінуў. Падчас агляду яго дома, паводле інфармацыі МУС, выявілі самаробную зброю.