Беларускі калій вяртаецца на амерыканскі рынак У кастрычніку ў порт Новага Арлеана павінна прыбыць каля 30 тысяч тон беларускіх калійных угнаенняў MOP — першая такая пастаўка ў ЗША за чатыры гады. Пастаўка стане першым фізічным пацвярджэннем аднаўлення гандлю беларускім каліем пасля змякчэння амерыканскіх санкцый супраць галіны. Раней Лукашэнка заяўляў, што Беларусь ужо пачала прадаваць калій амерыканскім пакупнікам. 21 верасня Трамп паведаміў пра працу Вашынгтона над буйной здзелкай па закупцы беларускага калію, заявіўшы, што ён можа быць таннейшым за канадскі. Пры гэтым 30 тысяч тон — адносна невялікі аб’ём, таму пастаўка мае пакуль перадусім сімвалічнае значэнне для вяртання Беларусі на амерыканскі рынак.