Сайт па вярбоўцы беларусаў на вайну пераехаў на расейскі дамен Пасля скандалу сайт «Защитник БЕЛ», які вярбуе беларусаў на вайну супраць Украіны, пераехаў у расейскую даменную зону, але захаваў фота вайскоўцаў Беларусі. Рэсурс прапануе грамадзянам РБ суправаджэнне пры афармленні кантракта і фактычна адкрыта рэкламуе ўдзел у вайне. Іншыя расейскія сайты таксама маюць раздзелы для беларусаў і нават абяцаюць удзельнікам «СВО» зямельныя ўчасткі ў Беларусі. Пры гэтым замежнікам для службы ў расейскай арміі патрабуецца расейскае грамадзянства, якое беларусам абяцаюць аформіць у паскораным парадку. А сама вярбоўка наймітаў для ўдзелу ў вайне можа падпадаць пад крымінальную адказнасць у Беларусі — паводле арт. 132 КК РБ.