🕖 7:00 раніцы. Што ў гэты час адбываецца ў магілёўскай калоніі № 15? У гэты час у магілёўскай калоніі пачынаецца ранішняя праверка. У кагосьці яшчэ ёсць час запарыць каву ці гарбату, калі ўстаць крыху раней. Але доўга затрымлівацца ў атрадзе не атрымаецца: зняволеных чакае праветрыванне. На двор трэба выходзіць пры любым надвор'і — і ў дождж, і ў мароз. На свежым паветры праводзяць 15–20 хвілін. Пра гэта распавёў былы палітвязень Кірыл Казей. Пасля праветрывання зняволеным дазваляюць ненадоўга вярнуцца ў атрад, але неўзабаве зноў выводзяць на двор — чакаць пастраення. Праверка можа стаць яшчэ адным выпрабаваннем, калі пачынаецца дождж. Сысці нельга: трэба стаяць, пакуль усіх не пералічаць пайменна. А высушыць мокрую вопратку пасля практычна няма дзе. Кірыл таксама ўспамінае, што ў калоніі № 15 людзі даволі часта гублялі прытомнасць падчас ранішніх праверак. Для такіх выпадкаў нават існуе спецыяльная брыгада з насілкамі, якая дастаўляе зняволеных у медчастку. Пасля праверкі зняволеныя ідуць на сняданак, а пасля — на працу. Праўда, перад выхадам на прамзону некаторым брыгадам даводзіцца чакаць у чарзе на ператрус і праверку асобы ад паўгадзіны да гадзіны. 🌿 Чытаць з Беларусі праз сайт-люстэрка