Вызвалілі Сяргея Рабцава 19-гадовага юнака затрымалі па "справе Зельцэра" восенню 2021 года за каментары пасля перастрэлкі і гібелі айцішніка Андрэя Зельцэра і супрацоўніка КДБ. Сілавікі зладзілі на Сяргея пастку: хлопца спецыяльна выклікалі ў ваенкамат, дзе яго ўжо чакалі, а дома ў ягоную адсутнасць правялі ператрус. Сяргея абвінавацілі адразу па пяці артыкулах Крымінальнага кодэкса, у тым ліку за "масавыя беспарадкі", "распальванне варожасці" і "абразу прэзідэнта". Сяргея асудзілі да 6,5 гадоў калоніі ўзмоцненага рэжыму. Больш за год да суда хлопец утрымліваўся ў гарадзенскай турме №1. Пазней улады традыцыйна ўнеслі яго ў спісы "тэрарыстаў" і "экстрэмістаў". Свой тэрмін палітвязень адбываў у ПК №3.