🔴«Авторадио» беш йилдан бери республика бўйлаб эфирга чиқишга рухсат ололмаяпти ✔️Радио қамрови камайиб бораётган вақтда бюрократик тўсиқларда қандай мантиқ бор? Ўзбекистонда радио тингловчилари улуши 21,9 фоизни ташкил этмоқда. Бироқ радиостанциялар ўз аудиториясини кенгайтириш учун республика ҳудудларига чиқишда муаммоларга дуч келмоқда. Тошкентда ўтказилган «Ўзбекистонда медиа истеъмолини ўрганиш бўйича миллий тадқиқот» натижалари тақдимотида журналист Назира Иноятова радиостанцияларнинг ҳудудий қамрови масаласини кўтарди. Унинг айтишича, «Авторадио» беш йилдан бери республика бўйлаб эфирга чиқиш учун ҳар йили тегишли ҳужжатларни топширмоқда, аммо ҳануз рухсатнома ололмаган. Ҳозирда радиостанция Тошкент шаҳри, Тошкент вилояти, Жиззах ва Сирдарё каби ҳудудларда эшитилади. Журналист радиостанциялар аҳолини қийнаётган муаммоларга бағишланган лойиҳаларни кўпайтиришга ҳаракат қилаётгани, бироқ эфир қамрови чекланган шароитда аудиторияни кенгайтириш қийинлигини таъкидлади. Шу муносабат билан у тадқиқотда радионинг оммабоплигига оид кўрсаткичлар ҳақиқий вазиятни қанчалик акс эттиришини сўради. Тақдим этилган миллий тадқиқот натижаларига кўра, 1411 нафар респондентнинг 21,9 фоизи радио эшитишини, 78,1 фоизи эса тингламаслигини билдирган. Радио тингловчиларининг 40,5 фоизи уни автомобиль бошқараётганда, 41,4 фоизи эса уй ишлари билан машғул бўлганида эшитади. Назира Иноятованинг саволига жавоб берган тадқиқот вакили натижалар ҳудудларда ўтказилган социологик сўровларга асосланганини билдирди. Унинг таъкидлашича, тадқиқотдан мақсад муайян ОАВни камситиш ёки бошқасини устун қўйиш эмас, балки аҳолининг ахборот истеъмолига оид маълумотларни тўплашдир. Шу билан бирга, тадқиқотнинг ҳам камчиликлари борлиги тан олинди. Келгусида бундай ўрганишларни ҳар икки йилда ўтказиш ва янада чуқурлаштириш мақсадга мувофиқлиги айтилди. Тадқиқот натижалари радио тингловчиларининг улуши нисбатан пастлигини кўрсатмоқда. Аммо бу ҳолатга фақат аҳолининг қизиқиши камлиги сабабми? Радиостанциялар республика бўйлаб тўлиқ эфирга чиқа олмаётган бўлса, уларнинг аудиторияси қандай кенгайиши мумкин? Хусусан, «Авторадио» беш йилдан бери нима сабабдан рухсатнома ололмаяпти? Бунга техник имкониятлар, радиочастоталар тақчиллиги ёки маъмурий тўсиқлар сабабми? Telegram | Instagram | You Tube | Facebook | X