«Энди хато қилишга ҳаққимиз йўқ» — Мирзиёев энергетика соҳасидаги камчиликлар ҳақида гапирди Президент Шавкат Мирзиёев энергетика соҳасида эришилган ютуқлар билан бирга, ҳали ҳал этилмаган муаммолар ҳам кўплигини тан олди. У инвесторлар билан муносабатларни янги босқичга олиб чиқиш ва барча масалаларни очиқ муҳокама қилиш зарурлигини таъкидлаган. «Биронта муаммо бугун қолмаслиги керак. Ҳамма масалани ҳал қилишимиз керак. Ютуғимиз бор, лекин камчилигимиз ҳам жуда кўп. Шунинг учун энди хато қилишга ҳаққимиз йўқ», — деди президент бугун бўлаётган инвесторлар билан учрашувда. Давлат раҳбари энергетикадаги муҳим муаммолардан бири — электр ишлаб чиқариш қувватлари ва уни истеъмолчиларга етказиб бериш тармоқлари ўртасидаги номутаносибликка эътибор қаратган. Хусусан, Фарғона, Андижон ва Наманганда электрга бўлган талабнинг бир қисми бошқа ҳудудлар ҳисобидан қопланмоқда. Янги саноат корхоналари ишга тушиши билан тармоқларга юклама янада ортади. Шу боис 2030 йилгача 5 минг километр электр тармоғи ва 16 та йирик подстанция қуриш, энергия сақлаш қувватларини 4,5 гигаваттга етказиш режалаштирилган. Президент сунъий интеллект ва дата-марказлар электр энергиясига талабни ошираётганини ҳам қайд этди. Эндиликда бундай марказлар учун алоҳида ҳудудлар белгиланиб, уларнинг асосий ва захира электр таъминоти, энергия сақлаш ва совитиш тизимлари олдиндан режалаштирилади. Яна бир муҳим янгилик — Ўзбекистон электр энергиясини Европа бозорига чиқаришни режалаштирмоқда. Озарбайжон ва Қозоғистон билан Каспий денгизи орқали «яшил» энергияни Европага етказиб бериш лойиҳаси амалий босқичга ўтмоқда. Афғонистон ва Жанубий Осиё ҳам истиқболли экспорт йўналишлари сифатида кўрилмоқда. Мирзиёев инвесторлар билан муносабатларда очиқлик ва шаффофлик асосий тамойил бўлиши кераклигини таъкидлади. «Биз бир-биримиз билан дўст бўлишимиз учун ҳамма нарса очиқ бўлиши керак, аён бўлиши керак, шаффоф бўлиши керак», — деди давлат раҳбари. Telegram |Instagram | You Tube | Facebook | X