🔴«Каримов журналистлар билан очиқдан-очиқ тўқнашувга борарди» Паҳлавон Содиқ ✔️ Каримов қандай қилиб BBCнинг «Аср одами»га айланган? BBC ва «Озодлик» радиосининг собиқ журналисти Паҳлавон Содиқ Ислом Каримов даврида хорижий ОАВ ва президент ўртасидаги мулоқот, журналистларнинг матбуот анжуманларидаги имкониятлари ҳақида гапирди. У бу ҳақда Uzdiplomat мухбири саволларига жавоб берар экан, 1990-йиллар охирида BBCнинг Ўзбекистон расмий идоралари билан очиқ ва расмий алоқалари бўлганини эслади. Унинг айтишича, 1997–1998 йилларда BBC Ўзбекистон Алоқа вазирлиги билан шартнома асосида ҳамкорлик қилган ва радионинг эрталабки ҳамда кечки эшиттиришлари ўрта тўлқинда Тошкентда ҳам тингланган. Бироқ 1998 йилда, шартнома муддати ҳали тугамаган бўлишига қарамай, эшиттиришлар тўсатдан тўхтатилган. Паҳлавон Содиққа кўра, ўша йилларда президент иштирокида матбуот анжуманлари тез-тез ўтказилган ва хорижий ОАВ вакиллари ҳам уларда қатнашиб, тўғридан-тўғри савол бериш имконига эга бўлган. «Ҳафтада икки-уч марта Дўрмонда матбуот анжуманларига борган пайтларимизни эслайман. Кескин-кескин саволлар бўларди. Каримов билан очиқдан-очиқ конфронтациялар ҳам бўлган», — дейди у. Паҳлавон Содиқ 1998 йилдаги ана шундай мулоқотлардан бирини ҳам эслади. Унинг сўзларига кўра, Ислом Каримов матбуот анжуманларидан бирида унга микрофон олдида: «Бугун BBCда ишлаяпсан, эртага “Озодлик”да ишлашинг мумкин. Лекин эсингдан чиқмасин, Ўзбекистон фуқаросисан», — деган. Паҳлавон Содиқ бу гапни ўша вақтда ўзига нисбатан таҳдид сифатида қабул қилганини айтади. «У қизишиб кетарди, эмоционал эди. Лекин биз саволларимизни сўрардик. Чунки журналист учун, у жавоб берадими-йўқми, саволни бериш муҳим», — дейди у. Унинг таъкидлашича, BBC мухбири сифатида биринчи шахснинг ўзига тўғридан-тўғри савол бериш имкони бўлган. Паҳлавон Содиқ Ислом Каримов билан бевосита алоқанинг яна бир эпизодини 1999 йил билан боғлайди. Унинг айтишича, ўша йили BBC «Аср одами» номли сўров ўтказган ва Ўзбекистондан келган кўплаб хатларда Ислом Каримовнинг номи кўрсатилган. «Биз телефон қилиб, натижани эълон қилмоқчи эканимизни айтдик. Бу Каримовга етказилган ва, албатта, унга ёққан. Кейин “BBC Ўзбекистон президентини Аср одами деб эълон қилди” деган мазмунда катта мақолалар “Халқ сўзи”, “Ўзбекистон овози”да чиққан», — дея эслайди у. Паҳлавон Содиқнинг айтишича, ҳукумат билан алоқа фақат президент матбуот анжуманлари билан чекланмаган. BBC Ўзбекистон расмийлари билан интервьюлар ўтказган, жумладан Содиқ Сафоев ташқи ишлар вазири этиб тайинланган даврда у билан катта интервью ҳам ташкил қилинган. Telegram |Instagram | You Tube | Facebook | X