Ўзбекистон олтин экспортини қарийб уч баравар камайтирди Ўзбекистон 2026 йилнинг январь–август ойларида 2,8 млрд долларлик олтин экспорт қилди. Ўтган йилнинг шу даврида бу кўрсаткич 8,3 млрд доллар бўлган. Демак, олтин сотишдан тушум 66,3 фоизга ёки қарийб 5,5 млрд долларга камайган. Миллий статистика қўмитаси маълумотларида олтиннинг мамлакат жами экспортидаги улуши ҳам 35,2 фоиздан 12,3 фоизга тушгани қайд этилган. Жорий йилнинг дастлабки саккиз ойида Ўзбекистон фақат икки ойда олтин экспорт қилган: апрелда 1,5 млрд долларлик, июлда эса 1,3 млрд долларлик. Августда хорижга олтин сотилмаган, деб ёзмоқда «Финмаркет». Олтин экспортининг қисқариши умумий кўрсаткичга ҳам таъсир қилган. Мамлакатнинг жами экспорти 3,4 фоизга камайиб, 22,9 млрд доллар бўлган. Айни пайтда, олтиндан ташқари товарлар экспорти 28,7 фоизга ўсиб, 11,5 млрд долларга, хизматлар экспорти эса 33,8 фоизга ошиб, 8,5 млрд долларга етган. Эслатиб ўтамиз, олтин экспорти камайиши фонида мамлакатнинг олтин захираси кўпайган. «Интерфакс» Марказий банк вакилига таяниб, сентябрь бошида Ўзбекистонда қарийб 439 тонна, қиймати 65 млрд доллар атрофидаги олтин сақланаётганини хабар қилган. Олтин халқаро захираларнинг тахминан 90 фоизини ташкил этган. Telegram|Instagram | You Tube | Facebook | X