Святлана Ціханоўская наведала Люксембург 22 кастрычніка беларуская лідарка выступіла ў Палаце дэпутатаў Люксембурга на сумеснай сустрэчы з кіраўніцтвам парламента і Камітэтам па замежных справах. У ёй удзельнічалі віцэ-спікер Андрэ Баулер, кіраўнік групы «За дэмакратычную Беларусь» Поль Галес і дэпутаты розных палітычных партый. Таксама Ціханоўская ўзяла ўдзел у кінафестывалі CinEast. На сустрэчы з кіраўніцтвам парламента і Камітэтам па замежных справах абмеркавалі: • вызваленне палітвязняў і дапамогу рэпрэсаваным; • дакументы, легалізацыю і адукацыю для беларусаў за мяжой; • падтрымку беларускай мовы і культуры; • еўрапейскую будучыню Беларусі і дапамогу Украіне. Таксама Ціханоўская прапанавала правесці ў Люксембургу ў 2027 годзе парламенцкі круглы стол па рэалізацыі «Люксембургскіх рашэнняў» і разгледзець магчымасць стажыровак для маладых беларусаў у парламенце краіны. На CinEast Ціханоўская далучылася да паказу фільма Волі Чайкоўскай «Not Made for Politics» і дыскусіі «Беларусь на раздарожжы» з дэпутатам Полем Галесам. Гаварылі пра падзеі 2020 года, ролю жанчын у пратэстах, жыццё ў выгнанні і міжнародную падтрымку Беларусі. «Дзякуй Люксембургу за паслядоўную падтрымку беларусаў. Мы цэнім дапамогу рэпрэсаваным, незалежным медыя і грамадзянскай супольнасці, увагу да беларускай культуры і гатоўнасць працягваць супрацоўніцтва».