Святлана Ціханоўская — пра супрацьстаянне расійскаму аўтарытарызму на Варшаўскім форуме па бяспецы 13 кастрычніка беларуская лідарка ўзяла ўдзел у панэльнай дыскусіі «Дэмакратычны фронт: лідарства супраць расійскага аўтарытарызму» на Варшаўскім форуме па бяспецы. Сярод удзельнікаў — былы прэзідэнт Эстоніі Тоомас Хендрык Ільвес, пятая прэзідэнтка Грузіі Саламэ Зурабішвілі і расійскі апазіцыйны палітык Уладзімір Кара-Мурза. Падчас дыскусіі Святлана Ціханоўская гаварыла пра еўрапейскую будучыню Беларусі, значэнне перамогі Украіны для рэгіёна і неабходнасць вываду расійскіх войскаў і ядзернай зброі з Беларусі. Яна таксама заклікала дэмакратычных партнёраў быць гатовымі да пераменаў у нашай краіне. Пра вызваленні палітвязняў і працяг рэпрэсіяў «Так, за апошні год каля 500 чалавек былі вызваленыя дзякуючы дыпламатычным намаганням ЗША і прынцыповай пазіцыі Еўрапейскага саюза. Але, нягледзячы на гэта, рэпрэсіі працягваюцца, і ніякай нармалізацыі сітуацыі ў Беларусі няма». Пра значэнне перамогі Украіны «Надзвычай важна, каб Украіна перамагла ў гэтай вайне. І я заклікаю ўсе краіны інвеставаць ва Украіну, таму што ўкраінцы абараняюць усіх нас. Калі Украіна пераможа, гэта дасць беларускаму народу імпульс, каб пазбавіцца залежнасці ад Расіі». Пра вывад расійскіх войскаў і ядзернай зброі «Мы павінны патрабаваць, каб уся ядзерная зброя, расійскія войскі, аб’екты для Расіі таксама былі выведзеныя з Беларусі. Бо праз нейкі час наша краіна можа зноў быць выкарыстаная для правакацый супраць Украіны ці, магчыма, еўрапейскіх краін». Пра гатоўнасць да пераменаў «Наша задача — быць гатовымі да пераходнага перыяду, таму што дыктатуры звычайна выглядаюць непераможнымі, пакуль раптам не абрынуцца. Але нашы партнёры таксама павінны быць гатовымі да зменаў у Беларусі і быць з намі менавіта ў гэты момант».