Польшча ўзмацніла кантроль за замежнікамі па новым правілам ETIAS Урад Польшчы 10 лістапада ўхваліў законапраект аб далучэнні краіны да еўрапейскай сістэмы ETIAS, якая дазволіць правяраць замежнікаў яшчэ да іх прыезду ў ЕС. Новыя правілы закрануць грамадзян краін, якія маюць права на бязвізавы ўезд у Еўрасаюз. Для атрымання дазволу на паездку трэба будзе падаць электронную заяўку і заплаціць 20 еўра. Акрамя таго, у Польшчы плануюць стварыць Нацыянальны рэестр замежнікаў, які аб'яднае звесткі пра іх асобу, дакументы, адбіткі пальцаў, рашэнні па легалізацыі і працаўладкаванні. Доступ да інфармацыі атрымаюць памежная служба, паліцыя, суды, пракуратура і іншыя дзяржаўныя органы. Запуск польскай сістэмы плануецца ў другім квартале 2027 года. Цяпер законапраект павінен прайсці разгляд у парламенце.