12 лістапада — шэсць гадоў з дня смерці Рамана Бандарэнкі. 31-гадовы мінчук памёр пасля жорсткага збіцця, калі выйшаў абараніць бел-чырвона-белыя стужкі на Плошчы Пераменаў. Яго забралі ў Цэнтральны РУУС, адкуль з цяжкай траўмай галавы даставілі ў бальніцу. У прытомнасць Раман ужо не прыйшоў. За яго забойства ніхто не панёс пакарання. Затое асудзілі лекара Арцёма Сарокіна і журналістку Кацярыну Барысевіч, якія абверглі афіцыйную версію пра алкаголь у крыві. Шэсць гадоў таму здавалася, што пасля такога жыццё ў Беларусі ўжо не зможа працягвацца па-ранейшаму. Але працягнулася. І гэта не значыць, што мы забыліся.