ДзяржДэп ЗША ўвёў санкцыі супраць беларускай кампаніі Armory Alliance за пастаўкі Ірану ПЗРК Дзяржаўны дэпартамент ЗША ўнёс у санкцыйны спіс кампанію Armory Alliance, зарэгістраваную ў Беларусі. Фірма дапамагае Ірану набываць партатыўныя зенітныя ракетныя комплексы. Паводле ДзяржДэпа, Armory Alliance працуе пасярэднікам паміж кітайскімі і іранскімі кампаніямі і садзейнічае закупцы сотняў ПЗРК. Пад санкцыі трапілі таксама яе генеральны дырэктар Мохамед Алі Толібаў, Алішэр Дамуладжанаў і нігерыйская Vanguard Tactical Supply Limited. У ведамстве назвалі гэтыя меры працягам кампаніі супраць іранскіх сетак закупкі ўзбраення. Яны перакрываюць каналы, праз якія Тэгеран спрабуе аднавіць арсенал, і накіраваны на выкананне зброевага эмбарга ААН, адноўленага ў верасні 2025 года.