The Бульба

Сітуацыя з нашым рашэннем спыніць арэнду памяшкання, у якім два гады знаходзіўся Дом Вольнай Беларусі ў Львове, стала своеасаблівым выпрабаваннем на шчырасць. Яна паказала, хто насамрэч з’яўляецца нашым партнёрам і саюзнікам, а хто толькі чакаў нагоды для злосці, радасці ад чужых цяжкасцяў і нападак. За апошнія дні мы атрымалі сотні слоў падтрымкі ад сяброў, партнёраў, прадстаўнікоў украінскай грамадзянскай супольнасці, валанцёраў, вайскоўцаў і проста неабыякавых людзей. І гэта яшчэ раз пацвердзіла галоўнае: Дом Вольнай Беларусі — гэта не сцены і не арандаванае памяшканне. Гэта людзі, ідэя і справа, якая аб’ядноўвае вакол сябе тых, хто верыць у свабоду, годнасць і перамогу над расійскай агрэсіяй. Наш праект сапраўды ўнікальны. Ён быў створаны самімі беларусамі для беларусаў ва Украіне і на працягу двух гадоў развіваўся дзякуючы падтрымцы беларускай супольнасці, большасць прадстаўнікоў якой жыве менавіта ва Украіне. Мы не залежалі ад грантаў і знешніх донараў. Мы будавалі гэты праект уласнымі сіламі, бо разумелі яго значэнне для беларускай супольнасці і для Украіны. За гэты час Дом Вольнай Беларусі стаў не проста грамадскай прасторай. Тут дзейнічаў музей, прысвечаны беларускім Героям, якія аддалі свае жыцці за свабоду Украіны. Тут праходзілі сустрэчы, выставы, адукацыйныя мерапрыемствы, працавалі адзіныя ва Украіне нядзельныя курсы беларускай мовы. Тут фармавалася жывая беларуская супольнасць. Калі шчыра, мы нават рады, што гэта адбылося менавіта цяпер. Гэта стаў своеасаблівы тэст, які дазволіў канчаткова зразумець, хто ёсць хто. Хто сапраўды падтрымлівае беларускую супольнасць ва Украіне і нашу дзейнасць, а хто толькі чакае нагоды для крытыкі, злосці і радасці ад чужых цяжкасцяў. Яшчэ раз пераканаліся ў тым, што за нашай дзейнасцю ўважліва сочаць. Прычым не толькі сябры і партнёры, але і нашыя нядобразычліўцы. Для мяне гэта таксама важны паказчык. Бо калі тое, што мы робім, выклікае такую ўвагу і такія эмоцыі, значыць, наша праца мае значэнне. Значыць, мы сапраўды робім нешта важнае і правільнае. Калі наша дзейнасць камусьці перашкаджае, калі яна выклікае раздражненне ў праціўнікаў свабоднай Беларусі і незалежнай Украіны, то гэта толькі пацвярджае, што мы рухаемся ў правільным кірунку. Таму ўсіх тых, хто сёння радуецца нашаму рашэнню пакінуць гэтае памяшканне, вымушаны расчараваць. Праект не закрываецца. Дом Вольнай Беларусі працягне сваю працу. Мы і надалей будзем праводзіць мерапрыемствы, развіваць нашы ініцыятывы, падтрымліваць беларускую супольнасць ва Украіне, захоўваць памяць пра Герояў і рэалізоўваць новыя праекты. Магчыма, зменіцца адрас. Магчыма, зменіцца фармат працы. Але нязменнымі застануцца наша місія, нашыя каштоўнасці і наша адказнасць перад людзьмі, дзеля якіх гэты праект быў створаны. Дом Вольнай Беларусі — гэта не памяшканне. Дом Вольнай Беларусі — гэта супольнасць свабодных людзей. А такія праекты немагчыма закрыць, пакуль ёсць людзі, якія гатовыя іх падтрымліваць, развіваць і бараніць. Мы працягваем працаваць. І будзем працягваць рабіць усё магчымае дзеля беларускай супольнасці ва Украіне, дзеля памяці нашых Герояў і дзеля будучыні свабоднай Беларусі. Жыве Беларусь! Слава Украіне!