The Бульба

Коул у Мінску: перамовы пра грошы, санкцыі і палітвязняў на фоне новай хвалі рэпрэсій у Беларусі Спецпасланнік прэзідэнта ЗША па Беларусі Джон Коул 15 верасня зноў сустрэўся з Лукашэнкам, працягнуўшы перамовы, у якіх вызваленне палітвязняў застаецца адным з галоўных пунктаў амерыканскага парадку дня. Лукашэнка заявіў, што Мінск адкрыты для абмеркавання любых пытанняў, але запатрабаваў «няўхільна» выконваць дасягнутыя дамоўленасці, а таксама настойваў на размарожванні каля $43–44 млн, якія, паводле яго слоў, захраслі ў Citibank. У адказ Коул пацвердзіў, што ЗША займаюцца механізмам вяртання гэтых сродкаў, а ранейшая амерыканская стратэгія ўжо прывяла да вызвалення сотняў зняволеных у абмен на паслабленне часткі санкцый. Пры гэтым Вашынгтон разлічвае на новую буйную групу вызваленых, а сам Коул раней заяўляў пра намер давесці агульную колькасць вызваленняў да тысячы; праваабаронцы, аднак, папярэджваюць, што вызваленні не спыняюць рэпрэсіўную машыну. Сімвалічна, што акурат напярэдадні і ў дзень прыезду Коула з калоній у Бабруйску і Віцебску, паводле інфармацыі праваабарончых крыніц, вывезлі некалькіх палітвязняў, аднак іх дакладная колькасць і месца знаходжання пакуль невядомыя. Новы раўнд перамоваў адбываецца на фоне відавочнага торгу паміж Мінскам і Вашынгтонам. Лукашэнка хоча фінансавых і санкцыйных саступак, ЗША — новых вызваленняў, а беларуская рэпрэсіўная сістэма тым часам працягвае працаваць, што ставіць пад сумнеў магчымасць сапраўднага спынення палітычнага пераследу.