Беларусы-добраахвотнікі ва Украіне апынуліся ў прававой пастцы Беларускім добраахвотнікам ва Украіне пагражае звальненьне з войска, калі да 10 лістапада яны ня змогуць прайсьці працэдуру легалізацыі. Праблема ў тым, што для гэтага неабходны арыгінал дакумэнта, які пацьвярджае асобу, а частка вайскоўцаў страціла пашпарты падчас службы. Аднавіць беларускі пашпарт ва Ўкраіне немагчыма, а вяртаньне ў Беларусь можа прывесьці да крымінальнага перасьледу. Паводле Анастасіі Махамет, вядома як мінімум пра восем такіх выпадкаў. Некаторыя вайсковыя часткі ўжо папярэджваюць пра магчымасьць звальненьня людзей без пашпартоў. Махамет прапануе прызнаць ваенны білет дакументам для пацьверджаньня асобы і статусу добраахвотніка. Праблемы таксама тычацца легалізацыі пасьля службы, выплат сем’ям загінулых і статусу зьніклых безь вестак ды ваеннапалонных.