Раніца ў Расеі зноў пачалася неспакойна — «чуйка» зноў не падвяла. У Чапаеўску Самарскай вобласці пасля атакі беспілотнікаў загарэўся буйны лагістычны хаб Ozon плошчай каля 135 тысяч квадратных метраў. Гэта адзін з найбуйнейшых высокааўтаматызаваных складскіх комплексаў кампаніі ў Паволжы. Таксама дроны ўдарылі па Новакуйбышаўскім НПЗ, разлічаным на перапрацоўку каля 8 мільёнаў тон нафты ў год. Выбухі прагучалі і ў Саратаве, а ў Ейску Краснадарскага краю пасля атакі беспілотнікаў неспакойна стала ў раёне марскога порта. У горадзе нават адмянілі кірмаш выходнага дня, спаслаўшыся на «неспакойную абстаноўку» — эўфемізм для «СВА ідзе па плане». А каля порта Наварасійска ў Чорным моры беспілотнікі ўразілі кантэйнеравоз RMS TEAM, пра што паведаміла турэцкая кампанія Akkon Lines. Першы Ozon пайшоў — з пачынам, Расея ўсё бліжэй да рэальнасці, у якой лагістыка, нафтаперапрацоўка і парты таксама жывуць паводле раскладу дронаў.