Апостолу от 70-ти Фаддею Едесскому Тропарь, глас 2 Днесь Еде́с град весели́тся,/ прие́м тобо́ю Креще́ния ба́ню,/ и Áвгарь, страсте́й премене́н, твою́ па́мять сла́вит./ С ни́миже пое́м и мы:/ весе́лия духо́внаго испо́лни живо́т наш/ и стра́сти исцели́,/ Фадде́е апо́столе, моли́твами твои́ми. Ин тропарь, глас 3 Апо́столе святы́й Фадде́е,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим. Кондак, глас 4 Я́ко звезду́ пресве́тлую/ Це́рковь тя стяжа́,/ апо́столе Фадде́е,/ чудесы́ твои́ми всегда́ просвеща́ема,// спаси́ ве́рою чту́щия па́мять твою́. Величание Велича́ем тя,/ апо́столе Христо́в Фадде́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.