У Тбілісі затрыманы беларус з пратэрмінаваным пашпартам. Яму пагражае дэпартацыя ў Беларусь. Мужчына падаваўся ў Грузіі на прытулак, але яму адмовілі. "6-га лістапада пасля праверкі дакументаў у метро яго спынілі і даставілі ў Дэпартамент міграцыі. І ў найбліжэйшы час прадставяць на арышт для дэпартацыі”, — расказаў @pozirkonline праваабаронца Раман Кісляк. Імя затрыманага не называецца з меркаванняў бяспекі. Але Кісляк адзначае, што ў Беларусі супраць затрыманага вядзецца палітычна матываваны пераслед. “Ён падаваўся на гэтай падставе на прытулак. Усім адмаўляюць, і яму ў тым ліку адмовілі ў статусе ўцекача — і ў Дэпартаменце міграцыі, і ў гарадскім судзе, і ў апеляцыйным”, — апісвае сітуацыю праваабаронца.