Прэм'ер-міністр Нарвегіі і прэзідэнт Фінляндыі пазванілі Пуціну. Яны заклікалі яго да спынення вайны ва Украіне і аднаўлення перамоваў. Размова была ўзгодненая з Кіевам, а адразу пасля яе Ёнас Гар Сцёрэ і Аляксандр Стуб сазваніліся з Уладзімірам Зяленскім. Гэта быў першы прамы кантакт Пуціна з еўрапейскімі лідарамі з 2025 года, калі яму тэлефанаваў прэзідэнт Францыі Эманюэль Макрон. Размову ініцыявалі лідары Нарвегіі і Фінляндыі. Яна стала працягам сустрэчы з Зяленскім, якая адбылася ў Осла 20-га кастрычніка. Стуб і Сцёрэ падкрэслілі, што ўдзельнічалі ў дыялогу як прадстаўнікі сваіх краін, а не Еўрасаюза ўвогуле. Яны сказалі Пуціну, што працягнуць падтрымліваць Украіну. "Абмеркаванне было прамым і па сутнасці. Мы суседзі Расіі. Тое, як скончыцца вайна, паўплывае на бяспеку Фінляндыі і Нарвегіі, а ў шырэйшым сэнсе — усяго Еўрасаюза. Для спынення вайны неабходныя прамыя перамовы", — сказаў пасля размовы Стуб. Прэс-служба Крамля ў адказ заявіла, што "справядлівы і трывалы мір ва Украіне магчымы толькі пры ўмове, калі будуць улічаныя інтарэсы Расіі".