Ініцыятыва MALDZIS набыла раннюю карціну Міхаіла Кікоіна — прадстаўніка Парыжскай школы мастацтва, які паходзіў з Гомеля. Знайсці яе атрымалася на аўкцыёне ў Ізраілі. Праца выкананая алеем па дошцы. Яна мае авальную форму і падпісаная аўтарам. Карціна называецца “Партрэт жанчыны” і датуецца 1918–1920 гадамі. Гэта ранні парыжскі перыяд творчасці мастака, калі ён яшчэ жыў у інтэрнаце “La Ruche” (“Вулей”) і толькі пачынаў набываць прызнанне. Твор Кікоіна быў куплены на сродкі Паўла Данэйкі, Івана Шылы і мецэнаткі, якая пажадала застацца неназванай. У будучыні карціну плануецца перадаць у Музей гісторыі Гомеля ў якасці грамадскага падарунка. Сёння ў гомельскіх музеях няма ніводнага жывапіснага твору Міхаіла Кікоіна.