У Польшчы арыштаваныя 11 беларускіх спартсменаў, якія прыехалі ў Бельска-Бялу на турнір па каратэ. Іх чакае высылка. Прычына — у турыстычных шэнгенах, выдадзеных іншымі краінамі. Як мяркуюць арганізатары, спартсмены мелі намер удзельнічаць у спаборніцтвах, таму мусілі атрымаць адмысловыя пад спаборніцтва візы. Агулам, як піша Gazeta Wyborcza, Чэмпіянат свету па каратэ для юніёраў выклікаў спрэчкі яшчэ да пачатку баёў. Расійская прапаганда абвінаваціла Польшчу ў блакаванні ўдзелу расійскіх спартсменаў. Паведамлялася, што яны збіраліся ўдзельнічаць у спаборніцтвах у нейтральным статусе, аднак Польшча нібыта рабіла ўсё, каб расіяне на турнір не прыехалі. У сваю чаргу польскі бок сцвярджае, што ніводны расійскі спартсмен на турнір так і не зарэгістраваўся. Апроч беларускіх каратыстаў затрыманыя і іх расійскія калегі.