Сяргей Ціханоўскі абвінаваціў праваабаронцаў у тым, што недалячыў зубы — маўляў, яны спынілі аплачваць яму лячэнне. Але ён абвяшчаў і персанальны збор на BYSOL, мэтамі якога былі пазначаныя ў тым ліку стаматалогія і пратэзаванне. Беларусы наданацілі 10 тысяч еўра — гэтых грошай таксама не хапіла, каб паправіць зубы? Справа ў тым, што прынамсі частку ад сабранай сумы блогер выдаткаваў не згодна з мэтамі збору, а каб заплаціць сваёй камандзе: прэс-секратару, аператару і ахоўніку. "Я збіраў… значыць, беларусы збіралі мне грошы на дапамогу, на аднаўленне здароўя. Там сабралі 10 з нечым тысяч. І вось з гэтых грошай я выплачваў заробак яму [прэс-сакратару Сяргею Бяспалаву. — Еўрарадыё], ахоўніку і аператару. Вось. А ў верасні ў мяне ўжо проста не было магчымасці больш плаціць. І я ў дваццатых чыслах верасня з усімі развітаўся. Ну, проста не было чым плаціць", — расказаў Ціханоўскі падчас стрыму пад назвай "Рэакцыя на стрым пра нізкі ўзровень незалежнай журналістыкі". А вінаватыя цяпер праваабаронцы.