Карабель з першай партыяй беларускага хлорыстага калію, які прыбудзе ў ЗША ў кастрычніку, ужо выправіўся ў дарогу — ці выправіцца бліжэйшымі днямі. Шлях судна з угнаеннямі з Усць-Лугі да Новага Арлеана, ад прычала да прычала, складае каля 30 сутак. Сам пераход праз акеан — без чакання і пагрузкі-разгрузкі — звычайна займае прыкладна 25 сутак. Расійскі порт Усць-Луга на гэты момант — бліжэйшы, праз які беларускія ўлады могуць пастаўляць калійныя ўгнаенні морам. У порт яны трапляюць па чыгунцы. І гэтая чыгуначная перавозка можа каштаваць амаль удвая даражэй, чым аналагічны трансфер у літоўскі порт Клайпеда. Таму эканамічны сэнс цяперашняй пастаўкі беларускага калію ў ЗША выклікае пытанні. Хутчэй, гэта сімвалічны жэст: Трамп паказвае Канадзе, што гатовы везці ўгнаенні хоць з іншага краю Зямлі — абы не набываць там. А Беларусь дэманструе, што сапраўды вызвалілася з-пад гэтай часткі амерыканскіх санкцый.