Украіна губляе 27 тысяч чалавек забітымі і параненымі штомесяц. Такія лічбы назваў прэм’ер Польшчы Дональд Туск — даныя ён атрымаў ад украінскіх партёнраў.. “Гэта, вядома, на жаль, рэкорды ў самым страшным сэнсе гэтага слова ў гэтай вайне. Пры такой тэндэнцыі зіма ва Украіне сапраўды можа быць катастрафічнай”, — заявіў польскі прэм’ер. Ацэньваючы перспектывы на бліжэйшыя месяцы, Туск выказаў сур'ёзную занепакоенасць развіццём канфлікту. “Кажу пра бліжэйшыя некалькі месяцаў, скажам, да ранняй вясны, бо, паводле ўсіх крыніц, менавіта позняя восень і зіма стануць самым крытычным часам у гэтай вайне”. Туск не выключае магчымасць пашырэння расійскага ціску за межы Украіны. Спасылаючыся на разведку, ён кажа, што ў планах Пуціна гібрыдныя ўдары беспілотнікаў і ракет па краінах, якія падтрымліваюць Украіну, у тым ліку па Польшчы.