Кіраўніца арганізацыі "Наш дом" Вольга Карач атрымала ўзнагароду "Амбасадар міру 2026". Цырымонія ўручэння адбылася ў Стакгольме падчас World Peace Conference. Гэты міжнародны форум праходзіць у шафранавых колерах, на ім шмат буддысцкіх манахаў. А сярод арганізатараў — Саюз тайскіх місіянераў у Еўропе (Union of Thai Missionaries in Europe), Будысцкі храм "Ват Будхарама" ў Швецыі (Wat Buddharama Sweden) і некамерцыйная арганізацыя "Трэк Непал" (Track Nepal). "Узнагарода адзначае шматгадовую праваабарончую і антываенную дзейнасць Карач, у тым ліку яе намаганні па абароне і падтрымцы ўцекачоў, гвалтоўна перамешчаных асобаў і іншых уразлівых груп, а таксама яе паслядоўную прыхільнасць міру, негвалтоўным метадам і мірнаму вырашэнню канфліктаў у Беларусі і па ўсёй Усходняй Еўропе", — сказана на сайце "Нашага дома". Сайт канферэнцыі ў сярэдзіне жніўня ўзламалі — і цяпер там анлайн-таталізатар.