"Дарэчы, а ты колькі палітвязняў вызваліў?". Падобна, беларусы крыху дасталі ў твітары спецпасланніка Дональда Трампа па Беларусі Джона Коўла. Грамадскі актывіст Віталь Макаранка напісаў Коўлу, што пакуль ён вызваляе сто чалавек, лукашэнкаўскі рэжым кідае за краты дзвесце. "Рэпрэсіі павінны спыніцца! А палітычных выгнаннікаў трэба вярнуць дадому", — дадаў Макаранка. Паплечніку Трампа гэта не спадабалася. "Насамрэч, колькасць вызваленых перавышае 700. Дарэчы, а ты колькі палітвязняў вызваліў?", — з'едліва адказаў ён. Тыдзень таму ў інтэрв'ю The New York Times Коўл расказаў, што разлічвае ў сярэдзіне верасня прыехаць у Мінск і дамовіцца на вызваленне новых палітвязняў. Ён хоча давесці колькасць вызваленых да тысячы.