Толькі палова беларусаў вяртаецца з адпачынку з адчуваннем поўнага аднаўлення. І чым старэйшы чалавек — тым цяжэй адпачыць на ўсе сто: пра эфектыўнасць адпачынку заявілі 70% маладзёнаў (да 25 гадоў) і толькі 41% працаўнікоў, старэйшых за 46 гадоў. Такія вынікі прынесла апытанка на партале rabota.by. Толькі ў 52% ад апытаных атрымліваецца адчуць сябе свабоднымі ад працоўных абавязкаў адразу як скончыцца апошні перад адпачынкам працоўны дзень. Яшчэ 27%, каб выдыхнуць, патрабуюць дзень-два. А астатнім трэба нават больш. Істотнай праблемай застаецца ўцягнутасць у працоўныя працэсы. 43% удзельнікаў апытанкі расказалі, што цягам адпачынку іх хаця б раз тузалі з працы. А нават эпізадычныя званкі ці кароткія адказы на лісты здольныя змарнаваць спробы перазагрузіцца!