Беларуская чыгунка рыхтуецца да таго, што цэнтр кіравання перавозкамі можа выйсці з ладу. Для гэтага ствараецца рэзервовая схема, высветліла Супольнасць чыгуначнікаў Беларусі. Намеснік начальніка Беларускай чыгункі Ігар Казлоўскі ў жніўні даручыў прыняць дадатковыя меры для мінімізацыі наступстваў "актаў незаконнага ўмяшання ў аб’екты кіравання працэсам перавозак". У Супольнасці чыгуначнікаў кажуць, што звычайна пад такой фармулёўкай маецца на ўвазе супрацьпраўнае дзеянне ці пагроза такіх дзеянняў, якія могуць парушыць бяспечную працу чыгункі. Але ў дакуменце не ўдакладняецца, які менавіта сцэнар разглядае кіраўніцтва БЧ.