🎬 Персанаж, які адлюстроўвае эпоху – у польскім серыяле стварылі вобраз беларускага доктара, які ўцёк з радзімы ад рэпрэсіяў На аднаго з герояў серыялу «Znieczulenie» («Анэстэзія»), прэм'ера якога адбылася на Netflix 4 лістапада, звярнуў увагу @mostmediaio. Цэнтральная фігура серыялу – нейрахірург, які пасля няўдалай аперацыі вымушаны пераехаць з Варшавы ў «правінцыйныя» Сувалкі на Падляшшы і працягваць сваю кар'еру ў мясцовым шпіталі. У тым жа самым шпіталі працуе прыбіральшчыкам беларус Алег Кавалёў. У свой час на радзіме ён быў доктарам, але прайшоў праз турму і цяпер змагаецца з ПТСР ды ўспышкамі агрэсіі. На паясніцы ў Алега – вялікі шнар ад выпаленага слова «здраднік» (так, менавіта па-беларуску). У Польшчы мужчыну даводзіцца доўга чакаць на пацверджанне свайго медычнага дыплому, таму пакуль што ён знаходзіцца ў самым нізе шпітальнай іерархіі. Праз псіхалагічныя праблемы, выкліканыя перажытымі падзеямі, Алег перыядычна крадзе псіхатропныя прэпараты. Але агулам яго паказваюць як эмпатычнага чалавека, здольнага адчуваць чужы боль. Ролю беларускага палітуцекача ў «Анэстэзіі» сыграў 31-гадовы ўкраінскі актор Андрэй Жураўскі. 👀 У адной з серыяў ускосна падымаецца і тэма «мігранцкага крызісу» на польска-беларускай мяжы. Сужэнцы выпадкова натыкаюцца ў лесе на цемнаскурую дзяўчынку, якая знаходзіцца ў крытычным стане, і выклікаюць хуткую дапамогу. Беларус Алег пазней вырушае на пошукі ейнай маці. Калі жанчыну знаходзяць, ён бярэ на сябе адказнасць зрабіць ёй аперацыю, у той час як галоўны герой серыялу выступае ў ролі ягонага асістэнта. У гэты момант паміж мужчынамі адбываецца такі дыялог: – А што ты ўвогуле рабіў у Беларусі? – Верыў шмат у што, хацеў нешта змяніць. – Але ўжо не верыш? На гэтае пытанне Алег адказу не дае.