🤨 135 рублёў за кавалак гісторыі: будынак у Ваўкавыскім раёне можа быць знесены пасля продажу за «капейкі» Дарэвалюцыйная пабудова, якая першапачаткова была паліклінікаю пры цэментным заводзе, паўстала ў пасёлку Краснасельскім яшчэ ў 1912 годзе. Яна дагэтуль захавала аўтэнтычныя рамы вокнаў і ўваходныя дзверы, звяртае ўвагу тэлеграм-канал @spadczyna. Арганізатарам электроннага аўкцыёну, падчас якога будынак збіраюцца прадаць, выступае Ваўкавыская цэнтральная раённая больніца. Таргі правядуць 10 снежня. Ацэначны кошт збудавання з мінулай эпохі на пачатак 2022 года складаў каля 100 тысячаў BYN, аднак гандляванні пачнуць з сімвалічнай сумы ў 135 рублёў. Новы ўласнік атрымае права ў тым ліку знесці былую паліклініку, калі таго пажадае.