💁🏻♂️ Менск адмовіўся выдаць Вільні літоўскага еўраскептыка і кавід-дысідэнта, якога на радзіме асудзілі за махлярства Гаворка пра 46-гадовага прадпрымальніка і палітыка Антанаса Кандротаса (мянушка «Цэлафанас»), якога неаднаразова судзілі яшчэ ў 2010-х гадах. У часе пандэміі Кандротас набраў папулярнасць дзякуючы сваім пратэстам супраць уведзеных у сувязі з хваробаю абмежаванняў. За месяц да выбуху паўнамаштабнай вайны ва Украіне «Цэлафанас» у складзе дэлегацыі маргінальнага літоўскага руху «Зара справядлівасці» наведаў Беларусь. Там для чальцоў руху (яны выступалі супраць знаходжання Літвы ў складзе NATO і Еўразвязу) арганізавалі сустрэчы з топавымі чыноўнікамі Лукашэнкі. У жніўні 2023-га Кандротас абвесціў пра стварэнне палітычнай партыі «Мы – Літва», а ў 2024-м планаваў удзельнічаць у прэзідэнцкіх выбарах (выбарчая камісія яго не зарэгістравала). Апошняя крымінальная справа ў дачыненні адыёзнага палітыка скончылася тым, што ў чэрвені гэтага года яму прысудзілі рэальны турэмны тэрмін (3,5 года) за ўхіленне ад сплаты падаткаў і незаконны гандаль палівам. Адбываць гэтае пакаранне Кандротас, аднак, не стаў – незадоўга да фінальнага судовага працэсу ён парушыў ужытую ў дачыненні да яго меру стрымання ды выехаў у Беларусь. Там мужчына даў інтэрв'ю дзяржаўным прапагандыстам, дзе прэзентаваў сябе ў якасці «палітычнага ўцекача». Ковенскі акружны суд улетку выдаў у дачыненні Кандротаса Еўрапейскі ордар на арышт, аднак Генпракуратура РБ адмовілася задаволіць хадайніцтва з боку Літвы пра выдачу палітыка.