🙈 Расейскага спевака абвінавацілі ў абразе ветэранаў праз майку з выявамі з беларускага фільму. Адзежыну ўсю раскупілі. Што адбываецца? Спявак Ягор Крыд з’явіўся ў кліпе «Милый ублюдок» у майцы з постарам фільму «Ідзі і глядзі» пра злачынствы нацыстаў у Беларусі. На прынце – палаючая вёска, а па-над ёй адрас крамы, якая прадавала гэтую рэч. Заснавальніца крамы KM20 Вольга Карпуць сама родам з Менску. У сацсетках спевака раскрытыкавалі за выкарыстанне трагічных вобразаў. А вось у маскоўскай краме, якая выпусціла цішотку, скандал, падобна, спрацаваў як рэклама. Усю партыю раскупілі. Каштавала адна рэч 38 600 расейскіх рублёў – больш за $450. У спрэчку ўключылася студыя «Масфільм», якая заявіла, што не давала дазволу на выкарыстанне постара і цяпер будзе разбірацца з крамай.