💬Қазақстан Республикасы Атом энергиясы жөніндегі агенттігінің төрағасы Алмасадам Сәтқалиев: Қазақстан тарапы құрылыс жұмыстарын бастау үшін барлық қажетті ішкі мемлекеттік рәсімдерді жүргізуге дайын екенін растаймыз. Оның ішінде келесі жылы тиісті орналастыру лицензиясын алу көзделіп отыр. Бұл құрылыс жұмыстарын бастаудың негізгі алғышарты болады. Құрылысты 2027 жылы бастау жоспарлануда. Құрылыс басталғаннан кейін жобаны іске асыру кестесіне сәйкес шамамен 10 жыл ішінде жұмыстарды аяқтап, алғашқы энергоблокты пайдалануға беру көзделіп отыр. Қазақстанның осы энергетикалық нысанды салу және пайдалану кезеңдерінде алатын пайдасы мен сөзсіз артықшылықтарын атап өту өте маңызды. Біріншіден, бұл еліміздің энергия тапшылығы байқалатын оңтүстігінде төмен көміртекті электр энергиясы көзін қалыптастыру. Бұл жалпы энергетикалық теңгерімнің тұрақтылығына және Орталық Азия өңіріндегі энергожүйе жұмыс режимдерінің тұрақтылығын қамтамасыз етуге ықпал етеді. Сонымен қатар бұл – отандық шикізатты, яғни қазақстандық уран өнімін атом электр станциясы үшін отын ретінде пайдалану мүмкіндігі. Бұдан бөлек, «Росатом» корпорациясымен ынтымақтастықтың кең ауқымын дамытуға мүмкіндік туады. Бұл – жоғары білікті кадрлар даярлау, ғылыми-қолданбалы зерттеулер жүргізу, ядролық отын циклі саласындағы жұмыстар және уран өнеркәсібіндегі ынтымақтастықты дамыту.