Your Tajikistan

🔴 То 13-уми ноябр дар Тоҷикистон борону барф ва хатари сел боқӣ мемонад Агентии обуҳавошиносии Тоҷикистон аз идомаи боришоти борону барф ва эҳтимоли фаромадани сел дар минтақаҳои кишвар то 13-уми ноябр хабар додааст. Ба иттилои ин ниҳод, дар рӯзҳои наздик ҳаво сард шуда, дар аксари минтақаҳо ноустувории вазъи боду ҳаво боқӣ мемонад. Дар ноҳияҳои водию доманакӯҳӣ асосан борон ва дар минтақаҳои кӯҳӣ, аз ҷумла баландиҳои беш аз 2000 метр, барф меборад. Ҳамчунин, шабҳои 12 ва 13-уми ноябр дар баъзе ноҳияҳои кишвар, ба истиснои ВМКБ, боронҳои шадид пешбинӣ шудаанд. Дар натиҷаи боришот эҳтимоли омадани сел дар ноҳияҳои доманакӯҳию кӯҳии вилоятҳои Суғд ва Хатлон, ноҳияҳои тобеи ҷумҳурӣ ва қисмати ғарбии ВМКБ вуҷуд дорад. Ҳамзамон, баланд шудани сатҳи оби дарёҳои Обихингоб, Вахш, Ёхсу, Қизилсуи Ҷанубӣ ва дигар рӯдҳое, ки аз нишебиҳои ҷанубии қаторкӯҳҳои Ҳисор сарчашма мегиранд, пешбинӣ шудааст. Мақомот аз сокинон даъват кардаанд, ки дар ин рӯзҳо эҳтиёткор бошанд ва қоидаҳои бехатариро риоя кунанд. Ёдовар мешавем, ки дар пайи боришоти рӯзи гузашта дар баъзе минтақаҳо, аз ҷумла шаҳри Кӯлоб, сел фаромада, ба роҳҳои мошингард ва қубурҳои обгузар зарар расонд. 📲 Your.tj дар ➡️ Telegram / Facebook / Instagram / TikTok / Threads