Your Tajikistan

Бонки миллӣ ба муассисаҳои қарзии Тоҷикистон 100 млн. сомонӣ пешниҳод кардааст Дар музоядаи қарзии Бонки миллии Тоҷикистон, ки 3 ноябр баргузор шуд, аз 100 миллион сомонии пешниҳодшуда танҳо барои гирифтани 37 миллион сомонӣ дархост ворид гардидааст. Меъёри миёнавазни фоизӣ 7,01 дарсади солонаро ташкил додааст. Ба иттилои Бонки миллӣ, ҳаҷми дархостҳо нисбат ба музоядаи қаблии 29 октябр қариб ду баробар зиёд шудааст. Он замон бонкҳо барои гирифтани 19,5 миллион сомонӣ муроҷиат карда буданд. Маблағи пешниҳодшуда ва меъёри фоизӣ дар ҳар ду музояда бетағйир мондаанд. Сабаби пурра истифода нашудани маблағи ҷудошуда аз ҷониби Бонки миллӣ шарҳ дода нашудааст. Қобили зикр аст, ки музоядаҳои қарзӣ бо мақсади таъмин намудани бонкҳо бо маблағҳои иловагӣ ва нигоҳ доштани пардохтпазирии онҳо баргузор мешаванд. Ин қарзҳо барои муҳлати 14 ва 28 рӯз бо пешниҳоди гарав дода мешаванд. Ҳамзамон, тибқи маълумоти Бонки миллӣ, меъёри миёнавазни фоизи қарзҳои сомонӣ барои муштариён дар моҳҳои январ–сентябр 23,52 фоизи солонаро ташкил додааст. Фарқият ба он вобаста аст, ки ҳангоми пешниҳоди қарз ба аҳолӣ бонкҳо хароҷот, муҳлати қарз ва хавфи барнагардонидани маблағро низ ба назар мегиранд. 📲 Your.tj дар ➡️ Telegram / Facebook / Instagram / TikTok / Threads