Your Tajikistan

Хонандагони тоҷик дар олимпиадаи байналмилалӣ аз фанни химия соҳиби се медали биринҷӣ шуданд Се хонандаи тоҷик дар Олимпиадаи байналмилалии химия ба номи Абурайҳони Берунӣ, ки дар Узбекистон баргузор гардид, мақоми сеюмро касб карда, бо медалҳои биринҷӣ қадрдонӣ шуданд. Дар ин бора хадамоти матбуоти Вазорати маориф ва илми Тоҷикистон хабар додааст. Ба иттилои манбаъ, дар ин сабқати байналмилалӣ 115 хонанда аз 17 кишвари ҷаҳон иштирок намуда, донишу маҳорати худро дар фанни химия санҷидаанд. Се медали биринҷиро Артём Батрутдинов ва Баҳодур Зиёев, толибилмони Литсей барои хонандагони болаёқати шаҳри Душанбе, инчунин Абдулло Бойзода, тарбиятгирандаи литсей-интернати «Ҳотам ва ПВ», ба даст оварданд. Вазорати маориф ва илм дастоварди хонандагонро натиҷаи заҳмати пайваста, истеъдод, кӯшишу талош ва шавқи баланди онҳо ба омӯзиш арзёбӣ кардааст. Ҳамзамон, саҳми омӯзгорон дар омода намудани хонандагон ба ин мусобиқаи байналмилалӣ махсус таъкид шудааст. Ба гуфтаи вазорат, маҳорати касбӣ, масъулиятшиносӣ ва таваҷҷуҳи омӯзгорон ба тарбияи хонандагони болаёқат дар ба даст овардани чунин натиҷа нақши муҳим гузоштааст. 📲 Your.tj дар ➡️ Telegram / Facebook / Instagram / TikTok / Threads