Your Tajikistan

Дар Душанбе шаш ноболиғ бо гумони содир намудани дуздӣ дастгир шуданд Кормандони милитсияи пойтахт шаш наврасро бо гумони даст доштан дар чанд ҳолати дуздӣ боздошт кардаанд. Онҳо ба манзилҳои истиқоматӣ ворид шуда, маблағ ва ашёи қиматноки сокинонро ба яғмо бурдаанд. Дар ин бора Раёсати Вазорати корҳои дохилӣ дар шаҳри Душанбе хабар додааст. Ба иттилои манбаъ, боздоштшудагон Сиддиқов А., Ғоибов М., Мусулмонов М., Яқубов О., Салоев М. ва Нарзуллоев М. мебошанд. Ҳамаи онҳо сокинони шаҳри Душанбе буда, ба таври пинҳонӣ ба хонаҳои шаҳрвандон даромада, пул, маснуоти заргарӣ, телефонҳои мобилӣ ва ҳуҷҷатҳои шахсиро дуздидаанд. Яке аз ҳолатҳои ошкоршуда ба манзили истиқоматии шаҳрванд Дилшодов М. дар кӯчаи Зафар марбут аст. Гумонбарон аз дохили ҷевони либос маблағҳои пулӣ, ҷавоҳирот, телефони мобилӣ ва дигар ашёи арзишмандро гирифтаанд. Арзиши умумии амволи рабудашуда беш аз 163 ҳазор сомониро ташкил медиҳад. Мақомоти милитсия иттилоъ додааст, ки то ин замон даст доштани ноболиғони боздоштшуда дар се ҳолати дуздӣ муайян гардидааст. Аз рӯйи ҳодисаҳо тафтишоти пешакӣ идома дорад. 📲 Your.tj дар ➡️ Telegram / Facebook / Instagram / TikTok / Threads