Your Tajikistan

Дар Тоҷикистон рӯзҳои 10 ва 11 ноябр борону барф ва сардшавии ҳаво дар назар аст Рӯзҳои 10 ва 11 ноябр дар аксари минтақаҳои Тоҷикистон ҳавои номусоид пешбинӣ мешавад. Интизор меравад, ки боришот ба амал омада, ҳарорати ҳаво паст гардад ва дар ноҳияҳои кӯҳӣ борон ба барф табдил ёбад. Дар ин бора Агентии обуҳавошиносии кишвар хабар додааст. Ба иттилои манбаъ, ҳарорати ҳаво дар водиҳо ва доманакӯҳҳо то +7…+12 дараҷа паст мешавад. Ҳамчунин, вазиши шамол бо суръати 13–18 метр дар як сония пешбинӣ гардидааст. Дар минтақаҳои кӯҳии баландии зиёда аз 2000 метр эҳтимоли боридани барф вуҷуд дорад. Рӯзи 10 ноябр, дар нимаи дуюми рӯз, дар аксари ноҳияҳои тобеи ҷумҳурӣ, шаҳри Душанбе ва вилояти Суғд боришоти шадид дар назар аст. То шом дар минтақаҳои кӯҳии баландии зиёда аз 2000 метр борон ба барф табдил меёбад. Шаби 11 ноябр низ дар баъзе ноҳияҳои тобеи ҷумҳурӣ ва вилояти Суғд боришоти шадид эҳтимол дорад. Ҳамзамон, аз 9 то 13 ноябр дар натиҷаи боришот дар минтақаҳои кӯҳӣ ва доманакӯҳии вилояти Суғду Хатлон, ноҳияҳои тобеи ҷумҳурӣ ва қисмати ғарбии ВМКБ хавфи фаромадани сел боқӣ мемонад. Илова бар ин, баланд шудани сатҳи оби дарёҳои Обихингоб, Вахш, Ёхсу, Қизилсуи Ҷанубӣ ва рӯдхонаҳое, ки аз нишебиҳои ҷанубии қаторкӯҳи Ҳисор ҷорӣ мешаванд, пешбинӣ шудааст. Мақомот аз сокинон даъват мекунанд, ки ҳангоми тағйирёбии обу ҳаво эҳтиёткор бошанд ва қоидаҳои бехатариро риоя намоянд. 📲 Your.tj дар ➡️ Telegram / Facebook / Instagram / TikTok / Threads