Your Tajikistan

Эмомалӣ Раҳмон бо сафари расмӣ ба Қазоқистон меравад Президенти Тоҷикистон Эмомалӣ Раҳмон рӯзҳои 5–7 ноябр бо сафари расмӣ дар Қазоқистон қарор хоҳад дошт. Дар ин бора Вазорати корҳои хориҷии Тоҷикистон хабар додааст. Ба иттилои вазорат, сафар бо даъвати Президенти Қазоқистон Қосим-Ҷомарт Тоқаев сурат мегирад. Интизор меравад, ки зимни мулоқоти сарони ду кишвар масъалаҳои густариши ҳамкориҳои байнидавлатӣ, таҳкими шарикии стратегӣ ва муносибатҳои ҳампаймонӣ баррасӣ шаванд. Ҳамчунин, тибқи иттилои сухангӯи Президенти Қазоқистон, Эмомалӣ Раҳмон рӯзи 6 ноябр дар шаҳри Остона дар нишасти байналмилалии «Раванди Ақаба» иштирок мекунад. Дар доираи ин чорабинӣ мулоқоти муштараки Эмомалӣ Раҳмон, Қосим-Ҷомарт Тоқаев, Президенти Ӯзбекистон Шавкат Мирзиёев ва Подшоҳи Урдун Абдуллоҳи II дар назар аст. «Раванди Ақаба» ташаббусест, ки соли 2015 бо ибтикори Подшоҳи Урдун роҳандозӣ шудааст. Дар доираи он намояндагони давлатҳо ва созмонҳои байналмилалӣ масъалаҳои амният, мубориза бо терроризм, ифротгароӣ, ҷиноятҳои киберӣ ва фаромиллиро баррасӣ мекунанд. 📲 Your.tj дар ➡️ Telegram / Facebook / Instagram / TikTok / Threads