Your Tajikistan

Полша барои 80 дӯзанда ва кафшергарон аз Тоҷикистон ҷойи кор пешниҳод мекунад Хадамоти муҳоҷирати Тоҷикистон 3 ноябр аз қабули шаҳрвандон барои кор дар Полша хабар дод. Корфармоёни ин кишвар ба кафшергарон ва дӯзандагон ниёз доранд. Барои кафшергарон синни аз 23 то 45-сола, доштани диплом ё сертификат оид ба технологияҳои MIG, MAG ё TIG, донистани забони русӣ ё англисӣ, инчунин таҷрибаи корӣ талаб карда мешавад. Музди меҳнат аз 8,91 доллар барои як соат оғоз мешавад. Шумораи ҷойҳои кории холӣ ҳанӯз эълон нашудааст. Барои дӯзандагон то 80 ҷойи корӣ пешбинӣ шудааст. Довталабон бояд аз 25 то 45-сола буда, забони русӣ ё англисиро донанд ва на камтар аз се сол таҷрибаи корӣ дошта бошанд. Музди меҳнат аз 9 доллар барои як соат оғоз шуда, тибқи иттилои Хадамоти муҳоҷират, даромади моҳона метавонад тақрибан ба 2500 доллар расад. Шаҳрвандон метавонанд барои гирифтани маълумоти бештар ва шартҳои пешниҳоди ҳуҷҷатҳо ба Маркази машваратии Хадамоти муҳоҷират дар шаҳри Душанбе, кӯчаи Айнӣ, 121 муроҷиат кунанд. Телефони тамос: 225-05-75. Марказ аз душанбе то ҷумъа, аз соати 08:00 то 17:00 фаъолият мекунад. Хадамот аз шаҳрвандон даъват кардааст, ки маълумотро танҳо аз манбаъҳои расмӣ санҷанд ва то тасдиқи шартҳои кор маблағро ба миёнаравон насупоранд. 📲 Your.tj дар ➡️ Telegram / Facebook / Instagram / TikTok / Threads