Your Tajikistan

Нақшаи даъвати тирамоҳӣ ба артиш дар Тоҷикистон беш аз 97 фоиз иҷро шуд Вазорати мудофиаи Тоҷикистон хабар додааст, ки дар давоми як моҳи маъракаи даъвати тирамоҳӣ нақшаи ҷалби ҷавонон ба хизмати ҳарбӣ беш аз 97 фоиз иҷро шудааст. Маъракаи мазкур 1 октябр оғоз гардида, то охири моҳи ноябр идома меёбад. То имрӯз Вилояти Мухтори Кӯҳистони Бадахшон, вилояти Хатлон ва шаҳри Душанбе нақшаи даъвати тирамоҳиро пеш аз муҳлат пурра иҷро кардаанд. Шаҳру ноҳияҳои тобеи ҷумҳурӣ низ 99,6 фоизи нақшаро таъмин намудаанд. Дар вилояти Суғд иҷрои нақша дар як моҳ ба наздики 92 фоиз расидааст. Ба иттилои Вазорати мудофиа, шаҳрҳои Хуҷанд, Бӯстон, Гулистон, Конибодом, Панҷакент ва Истиқлол, инчунин ноҳияҳои Айнӣ, Ашт, Зафаробод ва Кӯҳистони Мастчоҳ аз иҷрои пурраи нақша гузориш додаанд. Қаблан Вазорати мудофиа хабар дода буд, ки дар 10 рӯзи аввали маърака 84 фоизи нақшаи даъвати тирамоҳӣ иҷро шудааст. Дар мавсими имсола шаҳрвандони аз 18 то 27-сола, яъне ҷавонони солҳои таваллуди 1999–2008, ба хизмати ҳарбӣ даъват мешаванд. .📲 Your.tj дар ➡️ Telegram / Facebook / Instagram / TikTok / Threads