Your Tajikistan

Ҳисоботи оморӣ дар Тоҷикистон электронӣ мешавад Маҷлиси намояндагони Маҷлиси Олии Тоҷикистон рӯзи 21-уми октябр тарҳи нави Қонун «Дар бораи омори расмӣ»-ро қабул кард. Санади нав ҷойгузини қонуни соли 2010 мегардад. Дар ин бора рӯзномаи парлумонии «Садои мардум» хабар додааст. Яке аз навгониҳои асосии қонун манъи дахолати ғайриқонунии мақомоти давлатӣ ва шахсони мансабдор ба фаъолияти касбии мақомоти омор мебошад. Ҳадаф аз ин тағйирот таъмини мустақилият, воқеънигорӣ ва эътимоднокии маълумоти оморӣ аст. Тибқи қонуни нав, ҳисоботи оморӣ минбаъд метавонад ба таври электронӣ пешниҳод шавад. Ҳамчунин, истифодаи имзои электронӣ ва табодули маълумот миёни вазорату идораҳо пешбинӣ шудааст. Агентии омор имкон пайдо мекунад, ки маълумоти заруриро мустақиман аз пойгоҳҳои иттилоотии вазорату идораҳо дастрас намояд. Ин иқдом барои пешгирӣ аз талаб кардани маълумоти такрорӣ аз корхонаҳо ва коҳиш додани сарбории маъмурӣ ба соҳибкорон равона шудааст. Қонун таъсиси низоми ягонаи миллии омори расмиро низ пешбинӣ мекунад. Ба он Агентии омор, вазорату идораҳо, Бонки миллӣ ва дигар мақомоти ваколатдор шомил мешаванд. Ҳамоҳангсозии фаъолияти ин ниҳодҳо ва таҳияи усулҳои умумии ҷамъоварии маълумот ба зиммаи Агентии омор гузошта мешавад. Санади нав аз шаш боб ва 29 модда иборат аст. Акнун он барои баррасӣ ба Маҷлиси миллӣ пешниҳод мегардад. Пас аз тасдиқ ва имзои Президенти Тоҷикистон қонун баъди интишори расмӣ мавриди амал қарор мегирад. 📲 Your.tj дар ➡️ Telegram / Facebook / Instagram / TikTok / Threads