Your Tajikistan

Сарнозири шабакаҳои барқи Панҷакент барои беҷавоб гузоштани муроҷиати як шаҳрванд ҷарима шуд Суди шаҳри Панҷакент сарнозири шабакаҳои барқи шаҳрро барои риоя накардани тартиби баррасии муроҷиати шаҳрванд ба ҷавобгарии маъмурӣ кашидааст. Тибқи иттилои суд, Х.Х. муроҷиати шаҳрванд Д.Н.-ро вобаста ба тамғагузории ҳисобкунаки барқӣ бе баррасӣ гузошта, бе сабабҳои узрнок ба ӯ посухи хаттӣ нафиристодааст. Ин амал хилофи талаботи Қонуни Тоҷикистон «Дар бораи муроҷиатҳои шахсони воқеӣ ва ҳуқуқӣ» дониста шудааст. Дар робита ба ин ҳолат нисбати сарнозир бо моддаи 87-и Кодекси ҳуқуқвайронкунии маъмурӣ парванда тартиб дода шуда, суд ӯро ҷарима кардааст. Маблағи дақиқи ҷарима ва санаи қабули қарор эълон нашудааст. Моддаи мазкур аз 2 ҳазору 340 то 3 ҳазору 120 сомонӣ ҷаримаро пешбинӣ мекунад. Назари сарнозири муҷозотшуда дар бораи қарори суд дастрас нест. 📲 Your.tj дар ➡️ Telegram / Facebook / Instagram / TikTok / Threads